Stefnir í að Ísland verði mesta fóstur­eyðinga­land Norður­landa og þótt víðar væri leitað!

Fjölgun fóstureyðinga í 1021 í fyrra og HRIKALEG áform alþingismanna um langtum róttækari lagaheimildir gefa tilefni til að minna á, að Íslenska þjóð­fylkingin, sem er kristinn flokkur, ólíkt flokkunum sjö á Alþingi, samþykkti eftirfarandi ályktun á landsfundi sínum 2.apríl sl.:

"Ófædd börn eiga rétt til lífsins. Flokkurinn tekur einarða afstöðu gegn nýfram­komnum hugmyndum um róttækar breyt­ingar á fóstur­eyðinga­löggjöfinni og mun taka á þessum málum með það að markmiði að draga sem mest úr fóstur­eyðingum."

Hér var um ánægju­lega ákvörðun að ræða í stefnu­málum flokksins og full sátt um hana.

En með  fjölgun fóstureyðinga um næstum 100 milli ára (úr 926 árið 2015) þá er tíðnin hér komin upp í 13 fóstur­eyðingar á hverjar þúsund konur á frjósemis­aldri (15-49), en eru 13,3 á hverjar 1000 konur á Norður­löndunum. Með "líber­alíseringu" laganna frá 1975 -- með því að gera þetta formlega að "sjálfs­ákvörðunarr­étti" konunnar einnar og með lengingu fósturvígs­heimildanna úr 12/16 vikum upp í fullar 22 vikur -- stefnir þess vegna í, að Ísland verði mesta fóstur­eyðinga­land Norður­landa og þótt víðar væri leitað!

Gegn þessu mun einn flokkur standa og veita ábyrgðarlausum og gersamlega óupplýstum alþingismönnum fullt aðhald. Sá eini flokkur er Íslenska þjóð­fylkingin.

Jón Valur Jensson.

Fjölgun fóstureyðinga ekki óvenjuleg

Tvær af ályktunum landsfundar flokksins í dag, um framboð til borgarstjórnar og um lífsverndarmál

Báðar voru samþykktar samhljóða. 

I: Tillaga Guðmundar Þorleifssonar, sem á fundinum var kosinn formaður flokksins:

"Íslenska þjóðfylkingin lýsir yfir að hún mun bjóða fram í komandi borgar­stjórnar­kosningu. Það verður lögð áhersla á að aftur­kalla lóð undir mosku­byggingu; viðhaldi gatna verði komið í viðun­andi horf; stuðlað verði að upp­byggingu á félags­legu húsnæði með því að lóða­kostnaður verði einungis samkvæmt útlögðum kostnaði."

Og hér síðast er vitaskuld verið að tala um gatna­gerðar­gjöldin og önnur gjöld vegna lóða­úthlutana.

II: Tillaga Guðmundar Pálssonar læknis (um stytta útgáfu af lengri tillögu frá Jóni Val Jenssyni, Guðlaugi Ævari Hilmarssyni, Guðmundi Pálssyni og Maríu Magnúsdóttur):

"Ófædd börn eiga rétt til lífsins. Flokkurinn tekur einarða afstöðu gegn nýfram­komnum hugmyndum um róttækar breyt­ingar á fóstur­eyðinga­löggjöfinni og mun taka á þessum málum með það að markmiði að draga sem mest úr fóstur­eyðingum."

Hér var í báðum tilvikum um ánægju­legar ákvarðanir að ræða í stefnu­málum flokksins og full sátt um þær.

Þriðja ályktunin, sem samþykkt var á fund­inum, frá Birgi Lofts­syni sagn­fræðingi, um löggæzlu-, varnar- og öryggismál, verður kynnt hér á morgun.

jvj

Sitthvað kemur fram í tveimur þáttum Útvarps Sögu vegna djarfra, illa rökstuddra fullyrðinga í ECRI-skýrslu og víðar um "hatur" í orðræðu fjölmiðla

Athyglisvert: Eldur Ísidór sölustjóri og talsmaður hvítra forrétt­inda­homma hjá feðra­veldinu, segir skýrslu Evrópu­nefndar (ECRI) um kyn­þátta­misrétti og um­burðarleysi lykta af pólit­ískum ofsóknum. Þetta kom fram í viðtali hans við Ernu Ýr Öldu­dóttur í þættinum Báknið burt í Útvarpi Sögu í gær.

Eldur segir að þegar hann hafi farið lauslega yfir skýrsl­una þar sem meðal annars komi fram ásakanir á nafngreinda fjölmiðla, stjórn­mála­flokka og þingmenn hafi hann skynjað að hún bæri keim af pólitískum ofsóknum „svo ef maður skoðar aðeins hverjir eru á bakvið skýrsluna þá finnst mér þetta mjög vafasamt," segir Eldur Ísidór. 

Í öðru viðtali á Útvarpi Sögu, við Margréti Steinarsdóttur, framkvæmda­stjóra Mannréttinda­skrifstofu Íslands, kom fram, að engin alþjóðleg skilgreining er til um það hvað telst vera hatursorðræða.

Margrét bendir á að þær skilg­reiningar, sem til séu um stöðu minni­hluta­hópa, snúi ekki að haturs­orðræðu, heldur kynþátta­misrétti. "Það er skil­grein­ing í samningi Sameinuðu þjóðanna gegn kynþátta­misrétti og það er líka til skilgreining sem Evrópu­sambandið hefur stuðst við sem snýr fyrst og fremst að þjóð­ernis­uppruna og kynþætti, en alþjóðlega skilg­reiningin á hat­ursorðræðu er ekki til,“ segir Margrét.

Þeim mun furðulegra er, að fulltrúi hjá Lögreglunni á höfuð­borgar­svæðinu (vara­þingkona Vinstri grænna á síðasta kjörtímabili) og aðstoðar­saksóknari hjá embættinu hafa staðið fyrir málsóknum gegn allt að einum tug manns vegna "hatursorðræðu" og gengið furðulangt fram í því að finna sér til ótrúlegustu setningar að ákæra fyrir.

En það er gott að geta útilokað Mannréttindaskrifstofu Íslands frá því að hafa nokkuð komið að skýrslugjöf og vinnubrögðum ECRI-nefndarinnar, það kom skýrt fram í viðtalinu við Margréti.

Jón Valur Jensson.

Ný lög og stofnun í skoðun

Eru 80% Íslendinga þá rasistar?

Athygli og góðar undir­tektir fær hvöss ádrepa á DV.is í um­ræðu um ÍÞ:

María Magnúsdóttir, hjúkr­unar­fræð­ingur í Kefla­vík, ritar:

Hef verið í stjórn ÍÞ frá upphafi. Þar er engan ras­isma né fas­isma að finna. Þegið þið sem ekki vitið hvað þið bullið um! Flokkurinn vill stemma stigu við islamiseringu og er með mörg önnur mjög góð málefni sem aðrir flokkar tóku síðan upp eftir ÍÞ.

 

Þjóðernisflokkar eru flokkar sem vilja hjálpa þeim sem VIRKI­LEGA þurfa hjálp en ekki ryðja inn gervi­flótta­mönnum eins og stjórnvöld gera nú. Talandi um rasista, eru þá 80% þjòðarinnar rasistar því skv. könnun sem var gerð á sl ári eru 80% Íslendinga á móti mosku­bygg­ingu. Þið hljótið þá að vera sammála því! ??? NEI, ekki rasistar en bara fólk með glóru í hausnum. 

Þið viljið náttúr­lega að Ísland verði eins og Svíþjóð og fleiri lönd í Evrópu. OK, þá skuluð þið bara fá þann pakka. Það gæti alveg orðið einn úr ykkar fjölskyldu sem lendir í fyrsta ódæðisverkinu. Við skulum bara ræða saman þá, það lækkar í ykkur rostinn og kjaft­urinn þegar ballið byrjar. 

Eini flokkurinn sem þorði að tala gegn hryðju­verka­vá og tala af viti um innflytj­endamál var ÍÞ. Það gerði Sigmundur Davìð líka, Davíð Oddsson, Ingibjörg Sólrún og Björn Bjarnason. Af hverju kallið þið þau ekki rasista??. Enginn vill þá þróun hér sem er orðin í Evrópu en fólk er hrætt við svona fólk eins og ykkur o.fl. sem rífið kjaft og dæmið það sem þið vitið ekkert um. Fólk sem þorir ekki að tala af ótta við rasista­stimpilinn en er ósátt. 

 

Velferðar­kerfið springur og allt fer hér á annan endann með þessari fasista­stjórn sem nú situr við völd. Hvar er þjóðar­atkvæðið um mosku, áfeng­is­frumvarpið og útlendinga­lögin?? Þið sem hér mælið hluti út í loftið vitið greinilega ekki allan sannleikann um það af hverju ÍÞ fór svona. Fyrir því voru nokkrar ástæður en sumar ljótari en aðrar, áhlaup o.fl. sem aldrei var í raun upplýst fyrir alþjóð, svo endaði þetta með Hörpu­fundinum, flugelda­sýningunni sem varð þess valdandi að fylgið hrundi úr 3,2% niður í ekkert... öðruvísi gat það ekki farið....

Við tölum saman þegar ballið byrjar hér en það er reyndar byrjað í róleg­heitum, en kæru landar, það á ekki að segja ykkur sannleikann. Það er búið að taka upp Svíþjóðarleiðina þannig að ef innflytjandi fremur glæp er reynt að þagga hann niður. Þetta kallar maður að elska land sitt og þjóð... er þaggi?? Svona mikla umhyggju bera núverandi stjòrnvöld fyrir ykkur, kæru saklausu og blekktu landar. Enginn flokkur er fullkominn, hvorki ÍÞ né fjórflokkurinn, en eitt er víst að þjóð­ernis­flokk vantar á Íslandi, hvaða nafni sem hann nefnist. Þetta eru ENGIR rasistaflokkar heldur flokkar sem vilja vernda YKKUR öll... blekkt af fjölþjóða­væðingunni sem er búin að drepa Evrópu. Af hverju skyldu annars þjóðernisflokkar vera sterkustu flokkar álfunnar...ha ?? Því að fólk er búið að fá nóg af hryðjuverkum og ótta og ófriði. Það vill löndin sín til baka. Spyrjum að leikslokum, vinir!

Marine Le Pen: AFEITRAÐI frönsku Þjóðfylkinguna, hafnar öfgum og kynþáttahatri

Jafnvel Fréttablaðið viðurkennir, að flokks­leiðtog­inn Marine Le Pen hefur "af­eitrað flokk­inn og óspart rekið úr honum liðs­menn sem hafa sýnt af sér gall­harð­an þjóð­ernis­hroka eða boðað grímu­laust kyn­þátta­hatur eða Gyðingahatur."

Hófstillt stefna Marine Le Pen nær betur til frönsku þjóðarinnar en æsingaræður föður hennar, sem lét af forystu flokksins árið 2011, þá kominn yfir áttrætt. Hún er þó hörkutól gagnvart Evrópusambandinu, vill a.m.k. endurheimta þau full­veldisréttindi Frakklands sem afsalað hafði verið til Brussel, þótt vilji hennar sé raunar eindreginn í þá átt að landið segi sig úr ESB. Hún vill að óska­gjald­miðill íslenzkra vinstri manna og ESB-innlim­unar­sinna verði lagður niður: 

"Evran er ekki gjaldmiðill. Hún er pólitískt vopn. Evran er hnífur sem Evrópu­sambandið stingur í bakið á fólkinu til að neyða það til að fara þangað sem það vill ekki fara."

Nú er Marine aftur komin í forsetaframboð og mun njóta stuðnings a.m.k. fjórða hvers kjósanda. Ýmsir leiðtogar vinstri og hægri flokkanna hafa hrapað í áliti, Hollande forseti reynzt afleitlega, fjármála­hneyksli kippt fótunum undan jafnt hægri manninum Fillon sem öðrum.

Þá hafa hryðjuverk múslimskra öfgamanna aukið mjög fylgi Þjóðfylkingarinnar á ný, en í Frakklandi eru 5-6 milljónir múslima, og greinilega hefur ýmsum þeirra ekki tekizt að aðlaga sig frönsku þjóðfélagi og gildum. Áberandi er einnig Gyðingahatrið meðal öfgamúslima, og hafa sum hryðjuverkin beinzt að þeim, saklausum borgurum landsins, og hefur það jafnvel stuðlað að brottflutningi Gyðinga til Ísraels.

Full þörf er á því um alla Evrópu, að ríkisstjórnir þar taki raunsætt mið af því, að yfir 70% þeirra, sem afstöðu taka í skoðanakönnun Chatham House í 10 af helztu Evrópuríkjum, eru hlynnt því að stöðva þar móttöku fleiri múslima. 

PS. Opinbert, enskt heiti Íslensku þjóð­fylkingar­innar er the National Alliance. Við notum ekki hugtakið National Front, sem hefur hernaðarlegan hljóm (minnir á herfylkingu) og var í sumum Evrópulöndum á stundum tengt nýnazisma. Íslenska þjóðfylkingin fordæmir allan fasisma og kynþáttaandúð.

Jón Valur Jensson.

Stjórnleysið í Stjórnarráðinu er orsök hælisleitendaflóðsins

Hælisleitendur hingað til lands voru 1132 árið 2016, en 354 árið á undan. Frá Makedóníu komu 467 (sautjánföldun frá 2015) og Albaníu 231 (rúm­lega tvö­föld­un frá 2015). Þessari opinberu tölur (birtar í Rúv. á hádegi) sýna, að það sér vart högg á vatni þótt heild­ar­fjöld­i hæl­is­leit­enda, sem flutt­ir verða úr landi í janú­ar, verði í kring­um 100 manns (skv. viðtengdri frétt).

Lítil öfgasamtök, No Borders, geta æst sig yfir því, að flogið var með 41 hæl­is­leit­anda frá Íslandi til Makedón­íu í gær og síðar með a.m.k. tvo aðra hópa til þessara nefndu landa, en það er ekki nokkur ástæða til þess að gefa þessu farandfólki sjálfdæmi um það að gerast hér þiggjendur opinberrar aðstoðar.

Stjórnleysið í Stjórnarráðinu á þessu sviði sætir nú þegar mikilli gagnrýni einstakra sjálfstæðismanna, s.s. Halldórs Jónssonar verkfræðings og Ívars Pálssonar viðskiptafræðings, en einnig Björns Bjarnasonar, fyrrv. dóms- og menntamálaráðherra.

Útlendingastofnun hefur hvorki mannafla, fjárráð né sérfræðiþekkingu til að kanna hvert tilfelli rækilega, sem hér um ræðir. Það á að nægja henni að beita Dyflinnarreglugerðinni og gera það innan 48 klukkustunda, eins og Norðmenn gera og eins og Íslenska þjóðfylkingin leggur áherzlu á í grunnstefnu sinni.

Að sólunda milljörðum í gistipláss og uppihald í a.m.k. 8 mánuði að meðal­tali fyrir á annað þúsund manns, sem eiga í raun engan rétt á landvist hér og fríðindum, er augljóst dæmi um slappa frammi­stöðu stjórnvalda. Gott og vel, þau bjóða þá upp á, að önnur stefna taki við, þegar nógu margir kjósendur hafa sannfærzt um, að það gengur ekki lengur, að Ísland sé haft eins og stjórnlaust rekald, sem þennan daginn verður að lúta sjálfræðis­tilburðum aðvífandi útlend­ingahópa úr löndum múslima og hinn daginn stjórnsemi lítils, en háværs minni­hlutahóps sem talar í andstöðu við stjórnarskrá landsins.

Jón Valur Jensson.

Hundrað hælisleitendur úr landi

Kristin stjórnmálasamtök styðja Íslensku þjóðfylkinguna

Kristin stjórnmála­samtök, 17 manna samtök sem stofnuð voru 2007 og standa að Mogga­blogg­síð­unni Krist.blog.is, lýsa yfir stuðn­ingi við Ís­lensku þjóð­fylk­ing­una í kom­andi kosn­ing­um, m.a. vegna stuðn­ings þess flokks við full­veldi lands­ins, krist­in gildi og mál­efni fjölskyldna, heimila og fátækra; ennfremur að flokkurinn styðji trúfrelsi, en hafni trúarbrögðum sem eru andstæð stjórnar­skrá. Andstöðu Íslensku þjóðfylk­ingarinnar við hugsanlega islams­væðingu landsins á komandi árum skoða Kristin stjórn­mála­samtök sem eðlilega í ljósi reynslu nágranna­þjóða. Þau vænta einnig stuðnings flokksins við samvizku­frelsi lækna og hjúkrunar­stétta í mál­efnum ófæddra barna, sem og presta og kennara í störfum þeirra.

Aths.

Geta má þess, að ekki færri en fimm félagsmenn í Kristnum stjórnmála­samtök­um höfðu lagt Þjóðfylk­ingunni lið til að vera á framboðs­listum hennar. Vegna brott­hvarfs fjögurra af efsta fólki á Reykjavíkur­listunum og sorglegrar atlögu þeirra að framboð­unum 13. þ.m. misstu bæði Jón Valur Jensson og Tómas Ibsen Halldórsson af því að vera á listanum í Rvík-suður, og ekki náðist tímans vegna að safna nógu mörgum til stuðnings lista í NA-kjördæmi, þar sem KS-félaginn Snorri Óskarsson átti að leiða listann. Eftir eru þá tveir af KS-félagsmönnum í gildu framboði fyrir Þjóðfylkinguna: María Magnúsdóttir (í Keflavík) og Steindór Sigursteinsson (á Hvolsvelli) á Suðurlandslistanum.

Auk framboðs á Suðurlandi (frá Hornafirði til Reykjanesbæjar) býður Íslenska þjóðfylkingin einnig fram í Norðvesturkjördæmi (frá Akranesi og Hvalfirði vestur og norður um land, allt til Fljóta í Skagafirði). Er efsti maður í NV-kjördæmi Jens G. Jensson skipstjóri, en í Suðurkjördæmi Guðmundur Karl Þorleifsson rafiðnfræðingur.

XE fyrir Íslensku þjóðfylkinguna!

JVJ. 

Bregðast ekki við fyrstu tölum í sjónvarpssal

Fjór­menn­inga­klíkan braut lög og rétt á frambjóðendum Íslensku þjóðfylkingarinnar

Að mis­fara með undir­skrifta­lista og með­mæli með fram­boðs­listum til þing­kosn­inga er refsi­vert athæfi. Sjálf­nefndri fjór­menn­inga­klíku tókst að koll­varpa fram­boði í 2-3 kjör­dæm­um með skyndi­árás í kjölfar hótana, gerði það á versta tíma fyrir flokkinn. Athæfið ber merki þess að vera skipulagt.

Í nefndri klíku voru Gústaf Níelsson, sem í tilkynningu um fram­boðs­lista flokksins í efstu 10 sætum í Reykjavík-norður var í 1. sæti, Inga G. Halldórs­dóttir í 2. sæti sama lista, var ennfremur formaður kjördæmaráðs Reykja­víkur­list­anna, og Svanhvít Brynja Tómasdóttir, í 3. sæti sama lista. Ennfremur Gunnlaugur Ingvarsson, í efsta sæti flokksins í Reykjavík-suður. 

Fjarri fer því, að þessar fjórar persónur hafi látið sér nægja að draga sig í hlé af framboðs­listum flokksins og halda blaðamannafund í Hörpu til að tilkynna þetta, með ýmsum niðrandi ásökunum á hendur forystu flokksins -- ásök­unum sem fylgt var eftir í fleiri viðtölum við fjölmiðla, en var þó svarað að verðleikum.

Allt þetta, eins ósanngjarnt og það má teljast gagnvart félags­mönnum flokksins og hug­sjónum þeirra -- jafnvel þetta hefði ekki þurft að koma að sök, ef þau, fjögur talsins, hefðu látið sér það nægja, þ.e.a.s. að hverfa frá eigin fram­boð­um, jafnvel þótt þau kysu að að tjá sig með lítils­virðandi, en órök­studd­um hætti um formann flokksins. Allt það tjón, ef ekki hefði meira komið til, hefði mátt yfir­vinna með því að fylla í fjórar eyður á framboðs­listum flokksins og tefla nýjum mönnum fram til forystu þar.

En hér er sögunni komið að því misferli sem áður var getið um. Fjórmenn­ingarnir bættu gráu ofan á svart með eftir­farandi aðgerðum, sem eru stóralvarlegt mál: 

1) Þau hótuðu flokksstjórninni því að halda aftur ýmsum undir­skrifta­listum, afhenda þá ekki til flokksins, heldur halda þeim í sínum höndum og réttlættu það með því, að þau hefðu sjálf safnað þeim undir­skriftum, enda var t.d. Svanhvít ofur­meðvituð um að hún hefði safnað svo mörgum. En út í þessa hótun voru þau komin í gagnrýni sinni á Helga formann og ritarann Sigurlaugu á síðustu dögum áður en framboðsfrestur rann út 14. okt. Gunnlaugur Ingvarsson talaði við undir­ritaðan (þá á Austurlandi) í síma allt til 13. okt. um deilumálin og var mikið niðri fyrir um það sem hann kallaði annars vegar stífni foryst­unnar um undir­skrifta­listana og hins vegar að þær stöllur Inga og Svanhvít væru farnar að hóta ofangreindu, að halda eftir listum.

Þetta var svo einmitt það sem mun beinlínis hafa gerzt, því að ekki komu til flokksins listar um svo marga sem áður voru samkvæmt talningu orðnir meira en nógu margir í Reykjavíkur­kjör­dæm­unum báðum (lágmark gildra meðmæla í hvoru var 330). Líklegt er einnig, að þetta hafi átt við um einhverja meðmæl­enda­lista í SV-kjördæmi, þar sem skyndilega kom í ljós 14. okt., að ekki hefðu allir tilskildir og áður útreiknaðir meðmæl­endur komið fram.

Hér ber að hafa í huga, að meðmælendur skráðu nöfn sín í þágu þess, að Íslenska þjóð­fylkingin fengi að bjóða fram eins og aðrir flokkar, en ekki í þágu neinna einstakra safnenda nafnanna, sem þar með gætu slegið eign sinni á með­mælin í stað þess að skila þeim til flokksins sem síðan myndi afhenda þau yfirkjörstjórn 14. okt.

Að afhenda ekki þessi gögn, sem stefndu að því að verða opinber gögn frá bæði meðmæl­endum og frambjóð­endum, virðist fela í sér tvöfalt lögbrot (sjá neðar).

2) Staðfestar upplýsingar liggja fyrir um, að (a) Inga G. Halldórsdóttir hélt fyrir sig undirrituðum framboðsyfirlýsingum frá ýmsum frambjóðendanna í stað þess að leyfa þeim að komast til yfirkjörstjórnar Reykjavíkurkjördæmanna og (b) að hún beitti undirróðri í einkasamtölum við a.m.k. nokkra (ef ekki marga) skráða frambjóðendur í kjördæmunum báðum, í þeim bersýnilega tilgangi að fæla þá frá því að standa við framboð sín. Undarlega fljót varð hún til þes að fullyrða opinberlega, að "um 30" af frambjóðendunum 44 í Reykjavíkurkjördæmum hefðu "hætt við framboð sín", og er þó ekki vitað til, að boðað hefði verið til neins fundar með þeim. En vitnisburður a.m.k. tveggja þeirra liggur fyrir um þessar baktjaldaaðferðir Ingu, eins og fram kemur hér á eftir, en nánar mun svo undirritaður fjalla um hin ætluðu lagabrot sem áður var vísað til.

Af upplýsingum í símtölum við tvo frambjóðendur í Rvík-suður, Hilmar Sigurðsson iðnmeistara og Árna Thoroddsen, gat undirritaður greint mynztrið í baktjaldamakki Ingu og persónuárásar-aðferð: að hún hafi í símtölum gert mikið úr þörf þeirra fjögurra í klíkunni til að standa gegn meintu einræði og lögleysum af hálfu formannsins/forystunnar og haldið því að mönnum, að brýnt væri að koma í veg fyrir yfirvofandi fjárhagslega misnotkun Helga formanns á flokkssjóðum eftir kosningarnar (!!!), ásamt öðrum falsásökunum eins og t.d. þeirri, að HH og félagar hafi ætlað að ryðja burt 2X2 efstu mönnum af báðum Rvíkurlistunum! -- ásökunum sem hún hefur talið sig eiga létt með að smyrja á HH með tilvísan til þess, að þau hin þrjú í efstu sætum á listunum stæðu með henni í þessu, og með hliðsjón af því, að áheyrendur þessara ásakana töldu hana vita mun betur um málin en þeir sjálfir! Það var nóg, að þeim leizt ekki á blikuna og yrðu "skeptískir" á forystuna (orð HS um áhrif orða hennar á sig) og litist ekki á þetta meinta ástand, það hafði þessi áhrif t.d. á Hilmar (hans orð): "... það sem hún var að segja mér konan [Inga], að mér leizt ekki á þetta," og "mér féllust hendur", sagði hann "hún dró úr mér allan kjark", og þar með sótti hann ekki gula framboðs­blaðið sitt heim til hennar til að fara með það á flokks­skrifstofuna, eins og undir­ritaður hafði hvatt hann til; og þetta túlkar hún svo, að hann hafi dregið framboð sitt til baka! "En auðvitað hefði ég átt að ígrunda þetta betur sem hún var að segja mér," sagði Hilmar ennfremur við undir­ritaðan eftir þennan afdrifaríka föstudag 14. okt. og viðurkenndi, að hann hefði þá betur borið þetta undir mig. En: "Hún náði mér alveg að fæla mig frá þessu hún Inga, þannig að ég var orðinn skeptískur á þetta." 

Annar frambjóðandi var á sama gula undirskriftablaðinu, Árni Thoroddsen kerfishönnuður, sem upplýsti undirritaðan JVJ eftir á í símtali: "Hún [Inga] hringdi í mig [eftir blaðamannafund fjórmenninganna, sem sé 13. eða 14. okt.] og spurði hvort ég ætlaði þá ekki að fara af listanum. Ég sagði nei," sagði Árni, "því að ég gaf þér [JVJ] þetta loforð [að vera frambjóðandi í Rvík-suður] og yrði að ræða við þig. Hún sagði mér þessa sögu um að formaðurinn ætlaði að ræna sjóðnum, þegar framboðið væri komið í gang ..." (!). Ennfremur sagði Árni (og allt þetta hripaði undirritaður niður á umslag, sem hann skrifar upp eftir hér í þessa færslu): "Hún var mjög efins um að hún myndi leggja fram listann. Ég sagði bara að ég væri bundinn af mínu ..." (náði ekki að rita niður frh. orðalagsins). "Mér sýnist það refsivert að hún hafi verið að reyna að koma listum undan sem áttu að fara annað," bætti hann við. Ekki lagði hann í að fara upp í Breiðholt til að ná í gula blaðið til hennar og koma því á skrif­stofuna, enda ekki á eigin bíl, en vitaskuld átti Inga sjálf að koma þessu og trúlega fleiri blöðum á skrifstofuna í stað þess að draga t.d. svo úr Hilmari, að hann hætti við ferð til hennar til að koma sjálfur blaðinu á skrifstofu flokksins í Dalshrauni í Hafnarfirði.

Þessi var lokaályktun Árna um upphlaupsmál fjórmenninganna: "Þeir gera sig algerlega óhæfa til að fara í nokkur framboð í framtíðinni. Það treystir þeim enginn til að [bjóða sig fram fyrir annan flokk]."

Við erum komin hér að hugleiðingum um lögbrot. Lögfróður maður í flokks­stjórn ÍÞ taldi, að hér hefðu átt sér stað umboðs­svik í meðförum undirskrifta­listanna. En eftirfarandi fann undirritaður um umboðssvik í blaðagrein á netinu:

Umboðssvik er skv. 249.gr. almennra hegningarlaga það þegar menn misnota umboð sem þeir hafa fengið, t.d fjárreiður fyrir aðra, þannig að sá sem veitir umboðið sé bundinn af því. En í greininni segir: "Ef maður, sem fengið hefur aðstöðu til þess að gera eitthvað, sem annar maður verður bundinn við, eða hefur fjárreiður fyrir aðra á hendi, misnotar þessa aðstöðu sína, þá varðar það fangelsi allt að 2 árum, og má þyngja refsinguna, ef mjög miklar sakir eru, allt að 6 ára fangelsi."

Reyndar eiga umboðssvik í skilningi laganna ekki endilega við um alla misnotkun umboðs, sbr. eftirfarandi:

Eins og um önnur brot sem falla undir auðgunarbrotakafla almennra hegningarlaga þarf brotið að vera framið í auðgunarskyni. Þ.e. ásetningur þarf að vera til staðar um fjárhagslegan ávinning. Umboðssvikin eru svokallað hættubrot, þ.e það er nóg að brotið hafi skapað hættu á tjóni. „Nægilegt er að slík skuldbinding feli í sér verulega fjártjónshættu fyrir viðsemjanda eða annan aðila, endanlegt tjón þarf ekki hafa hlotist af," sagði Jónatan Þórmundsson, prófessor emeritus í refsirétti, á erindi um umboðssvik á lagadeginum 2010. 

En hér kemur samt til skoðunar, hvort skilyrðin, sem brotið þarf að uppfylla, svo að 249. gr. eigi við um þau, séu ekki einmitt uppfyllt þegar um er að ræða frambjóðendur, sem hafa verið settir í "hættu á tjóni" með eyðileggingu eða undanskoti nefndra fjórmenninga á framboðs­gögnum. Þetta getur átt við um hvort heldur frambjóðendur, sem reynt hafi verið að ryðja út af lista fram­bjóð­enda eða jafnvel þá, sem stóðu þar eftir óhnekktir í sæti ofarlega á lista eins og átti við um undirritaðan (nr. 2 á lista í Rvík-suður), en fóru í raun á mis við það sæti vegna þess að formaður kjördæmaráðs hafi vanrækt ábyrgð sína á list­anum og unnið beint gegn því umboði sem henni var falið í flokknum. "Endan­legt tjón þarf ekki að hafa hlotizt af," segir hinn sérfróði próf. em. Jónatan.

Í 2. lagi kemur hér einnig til skoðunar hugsanlegt brot gegn ákvæði í almennum hegningarlögum nr. 19/1940, skv. nýjustu gerð eins og hún finnst á alþingis­vefnum. Hér er það umfram allt 2. málsliður 162. greinar sem kemur til álita, en 1. málsliðurinn er þó tekinn hér með fyrir samhengið:

XVII. kafli. Skjalafals og önnur brot, er varða sýnileg sönnunargögn.

162. gr., 1. málsliður: Hver, sem rangfærir sönnunargögn eða kemur fram með röng sönnunargögn í því skyni að hafa áhrif á úrslit dómsmáls, skal sæta fangelsi allt að 2 árum. Ef málsbætur eru og brot varðar ekki þyngri refsingu að lögum má beita sektum eða fangelsi allt að 1 ári.

2. málsliður sömu greinar: Hver, sem til þess að halla eða fyrirgera rétti annarra, eyðileggur sönnunargagn, kemur því undan eða gerir það ónothæft að öllu eða einhverju leyti, skal sæta fangelsi allt að 2 árum …

Nokkuð ljóst virðist liggja fyrir, að undanskot með hálfopinber gögn geti í breiðri merkingu fallið undir hugtakið skjalafals, og með ætluðu undanskoti meðmælendalista og jafnvel frambjóðendalista virðist tilgangurinn hafa verið að "halla eða fyrirgera rétti annarra", þ.e. flokksmanna sem í góðri trú skráðu sig sem frambjóðendur, en voru blekktir til að aðhafast ekki, þegar sýnt var, að unnið var gegn framboði þeirra með illu umtali um meinta stjórnunarhætti for­manns eða framkvæmdastjórnar flokksins og jafnvel um meint framtíðarbrot (!) for­mannsins með stórfelldum fjársvikum í meðförum ríkisstyrks!

Ennfremur má ætla, að tilgangur þess að skjóta undan meðmælenda­listum hafi verið að koma að fullu í veg fyrir framboð flokksins í viðeigandi kjördæmum og að með þessu hafi þess verið freistað að "halla eða fyrirgera rétti ann­arra", bæði meðmæl­enda og frambjóð­enda og kjósenda, til að eiga sitt lýðræðislega val til jafns við aðra í frjálsu samfélagi.

Fróðlegt verður að sjá álit lögfræðinga á þessum álitaefnum.

* Sbr. yfirskrift meðmælendalistanna: "Undirritaður samþykkir að Íslenska þjóðfylkingin bjóði fram lista sinn í næstkomandi alþingiskosningum í Reykjavík­ur­kjördæmi norður [eða öðrum kjördæmum]". 

Jón Valur Jensson, fyrrverandi tilvonandi frambjóðandi í 2. sæti í Reykjavík­ur­kjördæmi-suður! - á sæti í 21 manns flokksstjórn Íslensku þjóð­fylk­ingarinnar.

Sjá einnig fyrri grein hér um sama mál, með öðruvísi nálgun þó og með fleiri upplýsingum að auki: Af blekkingarleik samsærishóps.

„Þetta er ákaflega óþverralegt“

Gunnlaugur telur Ísl. þjóðfylkinguna geta orðið stærsta flokkinn með tímanum, ef ...

... hinir skella skollaeyrum við ábend­ingum hennar. Glæsi­lega stóð hann sig í löngu viðtali á Stöð 2. Þar var hann þrá­fald­lega spurður út úr, en hafði svör við öllu. Hér er það augljóst öllum að sjá og frammistaða hans frábær:

„Ef hinir flokk­arnir hlusta ekki á þau varnaðarorð sem Íslenska þjóð­fylk­ingin hefur fram að færa þá skal ég lofa ykkur því að Íslenska þjóð­fylk­ingin verður innan skamms orðin stærsti flokkur á Íslandi,“ sagði Gunn­laugur Ingvars­son, oddviti Íslensku þjóðfylk­ingarinnar í Reykja­víkur­kjör­dæmi suður, í beinni útsendingu í Kosn­inga­spjalli Vísis í morgun.

Gunnlaugur sagðist aðspurður finna fyrir hræðslu meðal fólks að opinbera stuðning sinn við flokkinn. „Fólk er hrætt við það að vegna þess að það er hér í gangi svo pólitískur rétt­trúnaður og rétthugsun að ég hugsa að þetta sé verra heldur en þetta var nokkurn tímann í Austur-Þýskalandi á tíma kommúnismans og Erichs Honecker, því hér er fólki hreinlega hótað,“ sagði hann og bætti við að hann hefði sjálfur orðið fyrir aðkasti vegna skoðana sinna.

 

Orð hans um, að ÍÞ gæti orðið flokka stærst, styðjaast ekki aðeins við það, hvílíkt leiðtogaefni hér er augljóslega komið fram í sjálfum honum (já, horfið á myndbandið!), heldur nefnir hann sjálfur dæmin frá Danmörku og Svíþjóð þar sem einmitt þetta hefur verið að gerast, með Sví­þjóð­ar­demókrata með mesta fylgið nú í skoðanakönnunum og danska Þjóðarflokkinn sem stærsta og leiðandi flokkinn á þinginu.

Og þannig ritar fréttakona 365 um málið og vitnar í Gunnlaug Ingvarsson:

Íslenska þjóðfylkingin, sem býður fram í öllum kjördæmum, er einna helst þekkt fyrir umdeildar skoðanir sínar á málefnum innflytjenda. Hefur flokkurinn verið kallaður rasískur, þjóðernisflokkur, flokkur sem ali á andúð á útlendingum og þar fram eftir götunum. Gunnlaugur hafnar því þó alfarið að um sé að ræða rasískan flokk.

„Við viljum halda í okkar menningu, í okkar tungu og okkar sérkenni. Við erum enginn rasistaflokkur. Við viljum bjóða útlendinga velkomna sem eru tilbúnir að samlagast okkar þjóðfélagi og vinna landinu hér gagn. [...] Við erum bara venjulegt fólk. Við erum bara að segja að lærum að reynslu nágrannaþjóða okkar þar sem þessi reynsla er mjög slæm.“

Það var sannarlega tími til kominn asð þessi rödd fengi að heyrast hátt og snjallt og án þess að vera kveðin í kútinn með því að meina henni umfram aðra um málfrelsi, eins og andinn hefur gjarnan verið á RÚV.

Hér er kjördæmasíða flokksins (smellið á línuna, skrollið aðeins niður til að sjá Íslandskortið, smellið þar á línu ykkar kjördæmis, og þá blasir við undirskriftalisti meðmælenda). Hafið samband við skrifstofu flokksins um skil á meðmælendalistum í kjördæmum á höfuðborgarsvæðinu, í síma 789-6223 (Dalshrauni 5, Hafnarfirði) en um skil á listum í Norðausturkjördæmi, hringið annaðhvort í Snorra Óskarsson á Akureyri: 897-1174, hs. 481-1876, eða í mig í síma 616-9070, og við reddum málunum og útvegum hjálp til að koma öllum meðmælenda- og frambjóðendalistum í NA-kjördæmi til yfirkjörstjórnar á Akureyri í tæka tíð fyrir kl. 12 á hádegi nk. föstudag 14. okt., hálfum mánuði fyrir kosningarnar þar sem við þurfum koma rækilega á óvart með fylgi í takt við hinn góða málstað sem Gunnlaugur flutti svo vel í rökræðu sinni á Stöð 2 í gær.

Hér er hægt að skrá sig í flokkinn (afritið): x-e.is

Hér er stefnuskrá flokksins: thjodfylking.is/stefnan

Jón Valur Jensson.

Sjálfstæðisflokkurinn stærstur

Íslenska þjóðfylkingin heilsar lands­mönn­um á nýjum baráttu­vettvangi

Velkomin á bloggsíðu Íslensku þjóð­fylkingar­innar!

Við horfum djarfhuga fram til kom­andi alþingis­kosn­inga, hugsjóna­fólkið í þessum unga flokki sem er kominn til að gæta hagsmuna almennings, landsréttinda í bráð og lengd og að vera afl til skynsamlegra og réttlátra stjórnarhátta.

Mörg okkar hafa nú þegar að baki baráttu fyrir landi og lýð í Icesave-málinu, þar sem við Íslendingar fórum með sigur af hólmi gegn því sem ýmsir töldu ofurefli liðs: tveimur yfirgangssömum fyrrverandi nýlenduríkjum, Bretlandi og Hollandi. 

Þá hafa margir hér reynt að standa dyggan vörð um fullveldisréttindi Íslands í ræðu og riti, en ekki sízt í vefskrifum, og borið vitni um fásinnu þess, að Íslendingar gefi eftir fyrir þeirri ásókn áhrifaafla, að við látum sogast inn í stórveldi Evrópusambandsins.

Við höfum lagt réttlætismálum lið, fjallað um kjara- og lífeyrismál, tekið þátt í verkalýðsbaráttu, félags- og hugsjónastörfum, erum með breiða starfsreynslu til lands og sjávar að baki, sem gefur okkur innsýn í kjör alþýðu, ólíkt þeim sem fæddir eru með silfurskeið í munni og áttu greiða leið að völdum í gamla Fjórflokknum.

Eins og við höfum unnið þannig kauplaust í þágu réttlætis- og þjóðþrifa­mála, þannig vinnum við einnig fyrir þennan nýja flokk, sem enn hefur engan launaðan starfsmann og ekki launaða erindreka um allt land eins og stóru flokkarnir (launaðir með ríkisframlagi, teknu af skattgreiðendum).

Við erum þó með ágætt skrifstofuhúsnæði á leigu að Dalshrauni 5 í Hafnarfirði; með eigin framlögum flokksmanna höfum við getað staðið undir því, sem og nokkrum auglýsingum, skilta- og fánagerð o.fl. Einmitt nú, næstu vikurnar, vantar meira fé í hálftómann kassann til að standa undir frekara útbreiðslu­starfi, ekki sízt með ferðum í NV- og NA-kjördæmin til að safna bæði meðmæl­endum og fleiri frambjóðendum á listana. Framlög berist á styrktarreikning Íslensku þjóðfylkingarinnar, bankanr. 1161-26-4202 (kt. 420216-0330).

Þið munuð öll hafa heyrt flokk okkar atyrtran, en trúið því ekki! Við erum að sönnu eini flokkurinn sem hefur þor og dug til að hafna nýju útlendinga­lögunum og það af ærnum ástæðum, ekki sízt með hliðsjón af gjaldþrota innflytjenda­stefnu annarra norðlægra landa, sem komin eru allt of langt í háskalegu ferli sem virðist erfitt að gíra niður eftir á og haft hefur nú þegar margar sorglegar afleiðingar (sjá dæmin mörg í nýrri bók Hege Storhaug: Þjóðaplágan Íslam).

En hitt er þó fjarri öllum sanni, að við höfnum nokkrum manni vegna húðlitar hans eða trúar. Þvert á móti fordæmum við allt kynþátta- og útlendinga­hatur og viljum að vel sé gert við þá innflytjendur sem aðlagast íslensku samfélagi. 

Fyrir þá, sem vilja gerast meðmælendur framboðs okkar (án þess þar með að verða sjálfkrafa meðlimir flokksins og án skuldbindingar um það, hvað þeir muni kjósa hinn 29. næstkomandi!), er hér vefslóð á síðu með öllum kjör­dæmunum:  http://www.thjodfylking.is/kjoerdaemi 

Til dæmis er hér vefslóð beint inn á NA-kjördæmis-eyðublaðið (sem þar er svo hægt að prenta út úr tölvuprentara):

http://media.wix.com/ugd/6d9610_0c10e264741543ceaa50030c20a8f51d.pdf  

 

Fáið nöfn meðmælenda á blaðið og sendið vinsamlegast Þjóðfylkingunni, Dalshrauni 5, 220 Hafnarfirði.

 

Og hér er stefnuskrá flokksins með öllum helztu stefnumálum hans:  http://www.thjodfylking.is/stefnan

Þar gefst ykkur gott lesefni. Látum þetta nægja hér í bili. X-E fyrir Ísland og Íslensku þjóðfylkinguna!