Hræsnin er algjör

Birgir Loftsson deildi myndbandi frá NumbersUSA.

Hér er Bill Clinton að bölsótast út í ólöglega innflytjendur. Ekki er þetta gervi­frétt (fake news). Obama lokaði sjálfur á hættulega innflytjendur árið 2011 í hálft ár.

Frakkar, með Hollande Frakklands­forseta í broddi fylkingar, hóta sjálfir Evrópusambandinu, að ef það gerir ekki svo vel að passa ytri landamæri bandalagsins betur, þá muni hann/þeir senda herinn til að verja landamæri landsins.

Merkel varð sjálf að loka landamærahliði Þýskalands enda var innflutningurinn á hælis­leitendum orðinn gjörsamlega stjórnlaus og ógnaði innra öryggi ríkisins...

Evrópusambandið segist í dag taka á móti flóttafólki opnum örmum en í reyk­fylltum herbergjum semja þeir við Tyrki með mútum (milljarða framlögum) um að þeir loki landa­mærunum og það er öll mannúðin hjá þeim.

Guðni forseti kyssti sýrlensk börn í dag en sagði um leið að Íslendingar gætu ekki borið ábyrgð á né tekið við öllum flóttamönnum í heiminum (gáfuleg ályktun).

Mexíkóar, sem grenja yfir að geta ekki yfirfyllt Bandaríkin af eiturlyfum og glæpagengjum, hafa sjálfir skellt bakdyrum sínum í lás við landamæri Guatemala með girðingum sem Trump gæti verið stoltur af og beita Suður-Ameríkubúa, sem reyna að fara þar í gegnum, grófum mannréttindabrotum. Það er greinilegt að það er ekki sama hver gerir hlutina.

Stjórnmálaelítan í Evrópu er að fara á límingum vegna þess að þarna sér hún í fyrsta skipti stjórnmálamann sem framkvæmir kosningaloforð sem hún gerir ekki né starfar í þágu kjósenda. Hún segir að hann sé óútreiknanlegur en það er hann ekki. Hann stendur við hvert einasta kosningaloforð sem hann hefur sagst ætla að efna.

Þetta er því einfalt, Mexíkó borgar fyrir múrinn með sköttum, BNA gerir tvíhliða samninga við ríki heims í stað fjölþjóðasamninga og er hagstæðara fyrir alla aðila enda Dow Jones-vísitalan á rífandi uppleið og atvinnulífið býst við efnahagsuppsveiflu. BNA eiga marga bandamenn, eins og Ástrala og fleiri sem fjölmiðlar passa sig á að minnast ekki á; stuðningsyfirlýsingar margra þjóða við stefnu Trumps. Kastið steininum, þér sem eruð syndlaus... allir að passa upp á eigin hagsmuni.

  

 

Skoðað 86.202.251 sinnum

NumbersUSALíka við síðu

22. október 2016 

Hlýðið eða látið ykkur hverfa

Mál var að linnti aðförinni að Pétri Gunnlaugssyni

Fagna ber úrskurði Héraðsdóms Reykjavíkur að vísa frá dómi máls­höfðun gegn Pétri Gunn­laugs­syni, hdl. og útvarps­manni á Útvarpi Sögu, fyrir [meinta] haturs­orðræðu og út­breiðslu hat­urs. Óska má Pétri til ham­ingju með niður­stöðuna, einnig Jóni Stein­ari Gunn­laugs­syni hrl., verjanda hans.

Fráleitur var allur þessi mála­tilbúnaður af hálfu ákæruvaldsins og þeirra sem að baki þessu stóðu, en það voru annars vegar "lögreglufulltrúi hatursglæpa", Eyrún Eyþórsdóttir, fv. varaþingmaður Vinstri grænna, og stjórn Samtakanna 78 og lögfræðingur þeirra, hin lítt reynda Björg Valgeirsdóttir.

Vel mælt og víslega hugsuð orð á Ragnhildur Kolka um þetta mál í dag á skorinorðri vefsíðu Páls Vilhjálmssonar: 

"Það á að leggja niður þessa stöðu hatur­ssnuðrara innan lögregl­unnar. Nóg er af málum sem nýtt gætu meiri mannafla.

Enda er staðan pólitísk og ætlað að fylgjast með afar umdeildu pólitísku álitaefni. Orðið á að vera frjálst og aðeins á að hefta það ef um hvatningu til ofbeldis er að ræða."

Nákvæmlega. Lögreglan hefur verið fjársvelt, eins og líka Land­helgis­gæzlan (sbr. einnig hér), í mörg undan­farin ár, svo að til skammar og stórskaða hefur verið. Mál er að linni, að eytt sé stórfé úr ríkis­sjóði í pólitísk gælu­verkefni, sem virðast ekki hafa annan tilgang en að hefta eðlilegt tjáningarfrelsi.

Jón Valur Jensson.

Máli Péturs á Útvarpi Sögu vísað frá

Sjálfstæðisflokkur vill deila og drottna

Það hyggst hann gera í Reykjavík með því að hindra að aðrir en Fjór­flokk­urinn og Píratar komi mönnum að í borgar­stjórn; við það gengur honum bet­ur með því að þvert gegn lög­um verði borg­ar­full­trú­um ekki fjölg­að úr 15 við næstu kosn­ingar.

Sjálf­stæðis­flokkurinn, öllu heldur ráðandi öfl þar á bæ, hugsa jafnan fyrst um flokks­hag fremur en um lýðræðislegan valkost manna. Þetta átti sér ekki aðeins stað í aflandsskýrslumálinu í sept.-okt. sl., heldur einnig í þessu máli. Eftir að bæði borgarfulltrúi og þingmaður Sjálfstæðisflokks hafa kvabbað yfir þessari eðlilegu, með lögum ákveðnu fjölgun borgarfulltrúa, stígur nú fram Jón Gunnarsson, samgöngu- og sveitarstjórnarráðherra, sem ætlar að "leggja fram frumvarp á Alþingi sem felur í sér að skylda Reykjavíkurborgar til að fjölga borgarfulltrúum eftir næstu sveitarstjórnarkosningar verði afnumin." En af hverju á að undanþiggja eitt sveitarfélag öðrum fremur lagaskyldu, hr. ráðherra? Valhallar vegna, svo að hún fái meira tækifæri til að deila og drottna? En þetta er eini flokkurinn sem á færi á því að ná meirihluta borgarfulltrúa í krafti minnihluta atkvæða, með því kerfi sem viðgengizt hefur.

En með fjölgun fulltrúanna í 23 býðst smærri flokkum, jafnvel nýjum og fjárvana, tækifæri til að ná kjöri síns fyrsta borgarfulltrúa í krafti 4 til 4,3% atkvæða. Og það er sannarlega kominn tími til að fleiri raddir og sjónarmið heyrist í borgarstjórn heldur en hingað til. Vinstri menn hafa stjórnað þar afleitlega, fara illa með fé borgarbúa, gatnakerfið, leikskólana, grunnskólana, Reykjavíkurflugvöll og mörg önnur mál, en héldu einmitt kosningafylgi sínu í krafti þess hve lítið var traustið á Sjálfstæðisflokknum eftir Hrunið og er enn.

Og þetta er ekki spurning um að auka útgjöld borgarinnar. Eitt fyrsta verk nýrrar borgarstjórnar þarf að verða að lækka verulega laun borgarfulltrúa.

Jón Valur Jensson.

Afnema sjálfvirka fjölgun fulltrúa

Ríkisstjórnin óvinsæl

Hún mælist nú með 35% fylgi. Sjálfstæðisflokkur hefur enn misst fylgi, er nú 1,5% lægri en í MMR-könnun 10. jan. Aðrir þingflokkar auka svolítið fylgi sitt, nema Viðreisn sem mælist nú með 6,8%.

35% fylgið er mun minni stuðning­ur en aðrar rík­is­stjórn­ir hafa mælst með við upp­haf stjórn­ar­setu.

Þetta er jafn­framt í eina skiptið sem ný rík­is­stjórn hef­ur ekki mælst með stuðning meiri­hluta kjós­enda, sam­kvæmt MMR.

Við upp­haf stjórn­ar­setu síðustu tveggja rík­is­stjórna mæld­ist stuðning­ur við þær 56% (Sam­fylk­ing­in og Vinstri græn­ir) og 60% (Fram­sókn­ar­flokk­ur­inn og Sjálf­stæðis­flokk­ur­inn).

Sjálf­stæðis­flokk­ur­inn mæl­ist stærst­ur flokka í könn­un­inni með 24,6% fylgi. (Mbl.is)

Fylgistap flokks Bjarna Ben. kemur ekki á óvart eftir lélega frammistöðu hans gagnvart kjósendum í aflandseyjamálinu. Hann væri reyndar varla við stjórn­völinn nú, hefðu kjósendur verið upplýstir um feluleikinn strax í október, svo naumlega náði hann þingfylgi sínu.

46,7% kusu núverandi stjórnarflokka, og enn hrapa þeir í trausti.

JVJ.

Lítill stuðningur við ríkisstjórnina

Fráleit andstaða Pírata við Brynjar Níelsson sem formann stjórnsýslu- og eftirlitsnefndar

Í Mbl.is-frétt lætur Birgitta Jóns­dóttir sem það séu "stór­furðu­leg vinnu­brögð Sjálf­stæðis­flokks" að hafa fært for­mennsku í nefnd­inni í hendur stjórn­ar­liða. En óstjórn­tækur er flokk­ur Pír­ata og við­búið að neyð­ar­ástand gæti skapazt í m.a. stjórnar­skrár­málum ef Birgitta fengi leiðandi hlut­verk í nefndinni, með áherzlu þessa þing­manns á tillögur hins ólög­mæta stjórn­laga­ráðs, sem skipað var þvert gegn lögum um stjórn­laga­þing, eins og undir­ritaður hefur fjallað um víða, m.a. á Fullveldis­vaktinni.

Jón Valur Jensson.

„Stórfurðuleg vinnubrögð“

Það virðist almennt álit, að þöggun ríki um afbrot hælisleitenda

Í viðtengdri frétt sést að Her­kast­al­inn er nú lagður undir 90 hælis­leit­endur, verða þar "næstu misserin"!

En spurt var á vef Útvarps Sögu 13.-16. jan.: "Telur þú þöggun ríkja um afbrot hælis­leit­enda?" JÁ sögðu 91,92%, NEI sögðu aðeins 6,34%, en hlut­lausir voru 1,74%. Þetta er svo afger­andi munur, að ljóst er, að viðleitni hins volduga RÚV til að þagga niður áreitnimál albönsku karlmann­anna við krakka undir lögaldri í Reykjanesbæ hefur gersamlega mistekizt.

Íslenska þjóðfylkingin vill, að mál hælis­leitenda verði leyst með brottvísun þeirra innan 48 klukkustunda. Okkur ber ekki skylda til að taka við sjálfvöldu fólki í leit hér að efnahags­legum fríðindum. En þveröfugt miðað við álit almennings hafast yfirvöld hér að, bæði ríkis og borgar!

Tekið skal fram, að með upphafs­setningu þessa pistils er ekki á neinn hátt verið að tengja íbúana í fyrrverandi aðsetri Hjálp­ræðis­hersins, Herkastalanum, við siðsemisbrot þau sem framin hafa verið í Reykjanesbæ. En fréttnæmt er það sannarlega, að enn eitt gisti­húsnæðið hefur verið lagt undir hælis­leitendur í stað þess að grisja sem hraðast í fjölda þeirra hér á landi. Ekki er vanþörf á því fé, sem þar sparast, í heilbrigðis- og félagslega kerfinu fyrir landsmenn sjálfa.

Sjá um þetta fleiri greinar um innflytjendamál hér á vefsetrinu. 

Jón Valur Jensson.

90 manns í Herkastalanum

Upplýstir sjálfstæðismenn ofurliði bornir af nefbeinslausum

Björn Bjarnason er einn fárra sjálfstæðismanna sem þora að andmæla hinum vitavonlausa og jafnvel ó-kosningavæna (eða kosninga-óvæna) pólitíska rétttrúnaði Góða fólksins (sjáið hvernig S-listinn með "rasisma!"-hrópandi Semu Erlu innanborðs hrapaði næstum niður í ekki neitt!).

Fólkið í landinu vill ekki taka við á 2. þúsund ólöglegum hælisleitendum frá múslimaríkjum á hverju ári -- heldur ekki hann Björn, upplýstur eins og hann er, Ásmundur Friðriksson alþm. né við í Íslensku þjóðfylkingunni.

En Valhöll er á bandi Óttars Proppé -- eða komin í skrallbandið hans.   -JVJ.

„Reynt að koma rasistastimpli á þá sem benda á ósómann“

Björn Bjarnason fyrrverandi ráðherra og þingmaður Sjálfstæðisflokksins segir enga tilviljun að hælisumsóknum hafi fjölgað um 220% á árunum 2015 til 2016, en…

EYJAN.PRESSAN.IS (nánar hér - endilega fylgizt með þeirri vefslóð!).

 

Stjórnleysið í Stjórnarráðinu er orsök hælisleitendaflóðsins

Hælisleitendur hingað til lands voru 1132 árið 2016, en 354 árið á undan. Frá Makedóníu komu 467 (sautjánföldun frá 2015) og Albaníu 231 (rúm­lega tvö­föld­un frá 2015). Þessari opinberu tölur (birtar í Rúv. á hádegi) sýna, að það sér vart högg á vatni þótt heild­ar­fjöld­i hæl­is­leit­enda, sem flutt­ir verða úr landi í janú­ar, verði í kring­um 100 manns (skv. viðtengdri frétt).

Lítil öfgasamtök, No Borders, geta æst sig yfir því, að flogið var með 41 hæl­is­leit­anda frá Íslandi til Makedón­íu í gær og síðar með a.m.k. tvo aðra hópa til þessara nefndu landa, en það er ekki nokkur ástæða til þess að gefa þessu farandfólki sjálfdæmi um það að gerast hér þiggjendur opinberrar aðstoðar.

Stjórnleysið í Stjórnarráðinu á þessu sviði sætir nú þegar mikilli gagnrýni einstakra sjálfstæðismanna, s.s. Halldórs Jónssonar verkfræðings og Ívars Pálssonar viðskiptafræðings, en einnig Björns Bjarnasonar, fyrrv. dóms- og menntamálaráðherra.

Útlendingastofnun hefur hvorki mannafla, fjárráð né sérfræðiþekkingu til að kanna hvert tilfelli rækilega, sem hér um ræðir. Það á að nægja henni að beita Dyflinnarreglugerðinni og gera það innan 48 klukkustunda, eins og Norðmenn gera og eins og Íslenska þjóðfylkingin leggur áherzlu á í grunnstefnu sinni.

Að sólunda milljörðum í gistipláss og uppihald í a.m.k. 8 mánuði að meðal­tali fyrir á annað þúsund manns, sem eiga í raun engan rétt á landvist hér og fríðindum, er augljóst dæmi um slappa frammi­stöðu stjórnvalda. Gott og vel, þau bjóða þá upp á, að önnur stefna taki við, þegar nógu margir kjósendur hafa sannfærzt um, að það gengur ekki lengur, að Ísland sé haft eins og stjórnlaust rekald, sem þennan daginn verður að lúta sjálfræðis­tilburðum aðvífandi útlend­ingahópa úr löndum múslima og hinn daginn stjórnsemi lítils, en háværs minni­hlutahóps sem talar í andstöðu við stjórnarskrá landsins.

Jón Valur Jensson.

Hundrað hælisleitendur úr landi

Yfirgengileg áreitni Albanahóps á Suðurnesjum: kyssandi og káfandi á börnum í strætisvagni

„Strákurinn minn sagði mér frá því á föstudag að 2 bekkjarsystur hans voru áreittar í strætó af útlendingum og þeir eltu þær inn í Nettó. Þar læstu þær sig hágrátandi inn á klósettinu á meðan þeir börðu á dyrnar og kölluðu á þær. Lögreglan var víst kölluð á svæðið,“

segir í einni athugasemdinni á samfélagsmiðlum á Suðurnesjum, en þeir hafa logað i dag og í kvöld vegna ósæmilegrar eða kynferðislegrar hegðunar nokkurra manna í strætisvagni þar. Haft er eftir bílstjóra strætisvagnsins að mennirnir séu frá Albaníu og séu hælisleitendur sem búi í Reykjanesbæ. (Víkurfréttir segja frá: Áreittu börn í strætó og gerðu aðsúg að lögreglu.)

Samkvæmt þeim upplýsingum sem koma fram í a.m.k. tveimur lokuðum hópum hjá íbúum Reykjanesbæjar hringdu börn úr strætisvagninum í Neyðarlínuna og óskuðu aðstoðar lögreglu eftir að erlendir karlmenn voru að áreita börnin. Eru þeir sagðir hafa bæði kysst og þuklað á börnum í strætisvagninum. (Víkurfréttir.)

Greinilega er hér um þráláta áreitni að ræða sem tekin er alvarlega af lögreglu, sem þó er of fáliðuð til að ráða við ástandið nema með ýtrustu aðgerðum:

Í athugasemd við fésbókarfærsluna í öðrum lokaða hópnum kemur fram að umræddum mönnum hafi verið vísað úr landi og þeir eigi að yfirgefa landið á morgun.

 

Lögreglan á Suðurnesjum mun hafa haft afskipti af mönnunum um kl. 16 í dag þegar strætisvagninn kom að skiptistöð við Nettó í Njarðvík. Klukkustund síðar munu mennirnir hafa verið komnir aftur í strætisvagn í Reykjanesbæ og byrjaðir að áreita börn að nýju.

Ástandið er sannarlega mjög alvarlegt: 

Bæjaryfirvöld eru einnig hvött til að endurskoða mál hælisleitenda. Vitnað er til lögreglumanna sem segja marga til vandræða.

 

„Þið afsakið langlokuna,“ skrifar einn í ummælum. „Hef þetta staðfest eftir afar áreiðanlegum heimildum. Þessir menn ekki að áreita í fyrsta sinn eru alræmdir, frá Albaníu og sóttu hér um hæli. Það þarf ekki að tipla á tánum með það. Ég sem foreldri hringdi nokkur símtöl í kvöld og fékk þetta staðfest úr mörgum áttum - traustum heimildum. Hef einnig fengið skilaboð frá fólki sem börn þeirra hafa lent í þessum mönnum, starfsfólki t.d. úr verslun hér í bæ. Því miður þá tipla margir á tánum því þetta eru hælisleitendur!! Ekki rugla saman sýrlenskum fjölskyldum sem flýja stríð og örbirgð. Þetta eru albanskir stakir karlmenn - glæpamenn. Þetta eru staðreyndir. Það koma eflaust meiri upplýsingar á næstu dögum en eftir þau símtöl og samtöl sem ég hef átt í kvöld þá er þetta engin lygi. Þessi mál eru eldfim en það á ekki að þagga þetta. Við eigum ekki að gefa afslætti [heldur] vísa fólki burt hið snarasta sem ekkert erindi hefur hérna“. (Víkurfréttir enn.)

 

Hvenær ætlar yfirvöldum hér að skiljast, að þeim ber umsvifalaust að stemma stigu við frekari innflutningi hælisleitenda frá Albaníu og Makedóníu í stað þess að vista hér um 700 manns á dýrum hótelum, þar sem meirihlutinn er frá þessum löndum og þar í heilu gengin af yfirtroðslulýð gegn saklausum bæjarbúum í yngstu aldursflokkum?

Aðsúgur gerður að lögreglu

Grípum enn niður í umræðum fólks á samfélagsmiðlunum:

Lögreglan er fámenn og hafa lítil úrræði en eru að gera sitt besta. Þeir fóru og ætluðu að ná mönnum í yfirheyrslu í dag en gátu ekki, því þegar þeir komu uppá Ásbrú mættu þeim 20-30 manns með aðsúg. Þetta eru hælisleitendur sem eru á vegum ríkisins ...

 

"Þá kemur fram í  færslum að foreldrar ætla að mæta í strætisvagna í Reykjanesbæ á morgun, eftir skóla, til að hafa eftirlit og vernda börn sem nýta sér þjónustu vagnanna." (Víkurfréttir.)

 

Ætla stjórnvöld nokkuð að sofa á þessu máli, þótt Óttarr Proppé, sem vill fá hingað hátt í 500.000 flóttamenn, sé kominn í ríkisstjórnina? Maður þakkar sínum sæla fyrir, að hann fekk ekki innanríkisráðuneytið!

 

JVJ.

Sagðir hafa kysst og þuklað á börnum

Horfandi fram hjá öllu yfirborðsskvaldri BB & Co.: Afleit ríkisstjórn!

Ekki ríkisstjórn vinnandi stétta, heldur atvinnurekenda, ekki þjóð­rík­isins, heldur ESB-sinna* og ótryggs BB, ekki landsbyggðarfólks, heldur auðkýf­inga, ekki sjómanna, heldur útgerð­ar­manna, ekki miðflokka, heldur mestu einka­væð­ingar- og hægri­flokka frá upphafi, með "Bjarta framtíð" í bandi með aumlegt umhverf­is­ráðuneyti sem dúsu sína eða hundabein, auk hins erfiða heil­brigðisráðuneyt­is.

Hér verður ekki unnið að gagnsæi og heiðarleika við að upplýsa um vafasama og skattsvika-fjármála­gerninga, heldur verður byggt á því sem hornsteini að kyngja því, að Bjarni Bene­diktsson stakk aflandsmála­skýrsl­unni undan meira en mánuði fyrir kosning­arnar í haust. Hann hefði ekki unnið sinn mikla kosninga­sigur á þessum grundvelli.

Jón Bjarnason, fv. ráðherra, sannur fullveldissinni, ritar í dag, í grein sinni Landbúnaðar- og sjávarútvegsráðuneytið í hendur Evrópustofu:

Sjávarútvegs- og landbúnaðrráðuneytið hefur verið í raun útvörður stjórnsýslunnar gegn aðlögunar og innlimunarferlinu í ESB.Utanríkisráðuneytið var löngu fallið í hendur ESB-sinna.

Evrópustofa með ráðherrastólana

Flestir þingmenn Viðreisnar eru fyrrerandi forstöðumenn eða starfsmenn Evrópustofu og samtaka ESB hér á landa. Evrópustofa hafði það að markmiði að stýra Íslandi inn í ESB, kortleggja hvaða stofnanir, einstaklinga og félagasamtök þyrfti að ná á sitt band. Að því hefur skipulega verið unnið  með glæstum árangri því miður:  Kannski verður formaður Já Ísland-samtakanna fyrir inngöngu í ESB nýr sjávarútvegs- og landbúnaðarráðherra.

Ég held að mörg þau sem kusu Sjálfstæðisflokkinn síðast myndu hafa hugsað sig tvisvar um ef þau vissu að þar með væri verið að kjósa yfir sig hreina ESB-ríkisstjórn.

* Jafnvel Óttarr Proppé gumar af því í 19-fréttum Rúv, að inni í stjórnar­sátt­málanum sé þjóðar­atkvæða­greiðsla um Evrópu­sambandið! Vitað er fyrir, að "Björt framtíð" er ESB-flokkur, ekki aðeins í bandi "Viðreisnar", sem einhverra hluta vegna er ríkasti flokkurinn, heldur er flokkurinn eindreginn Evrópu­sambands­flokkur skv. vitnisburði Páls Vals Björns­sonar, stjórnar­manns og fv. þingmanns Bjartr­ar framtíðar, í viðtali hans við Mbl.is í dag: "þess­ir tveir flokk­ar, Viðreisn og Björt framtíð, eru Evr­ópu­flokk­ar," segir hann þar án tvímæla!

Jón Valur Jensson.

Hefur áhyggjur af landsbyggðinni