Erdogan Tyrklandsforseti fær nánast einræðisvöld, gegn fólki þar í stóru borgunum, en með stuðningi sveitafólks og Tyrkja í Evrópu

73,5% Tyrkja í Aust­ur­ríki, sem greiddu atkvæði um að færa Erdogan þessi miklu völd, sögðu JÁ, 63% í Þýskalandi, rúm­l. 75% í Belg­íu og 71% í Hollandi. Tryggari eru þeir islamista-forsetanum en lýðræðis­hugsjón Evrópu­manna. Það sama er að segja um afstöðu kjósenda á dreifbýlli svæðum Tyrklands, í Mið-Tyrklandi, sunnar og norðar við Svartahaf.

Karlinn rétt mer þetta með rúmu 51% atkvæða, og því getur það hafa ráðið úrslitum, að kosninga­svik hafi verið í tafli, eins og yfirvöld eru nú þegar sökuð um og kröfur uppi um að kæra það. En ekki auðvelda þessi úrslit gengi lýð­ræðis­flokka og fjölmiðla að andmæla hinum yfirlýsta islam­ista Erdogan, en nú þegar hefur hann beitt blöð, útvarps- og sjónvarps­stöðvar miklu harðræði eftir uppreisnar­tilraunina gegn honum í fyrra.

Að vera með mikinn meirihluta meðal hinna 2,9 milljóna Tyrkja í Evrópu á bandi forsetans í þessu máli, styrkir ekki trú fólks hér í álfu á að gott geti hlotizt af því að standa uppi í hárinu á Erdogan varðandi flótta fólks í gegnum Tyrkland til Evrópu. Fyrir að halda slíkum flótta í skefjum fær tyrkneski ríkissjóðurinn mörg hundruð milljarða árlega frá ríkjum eins og Þýzkalandi, Austurríki og Evrópu­sambandinu, en Erdogan hefur þegar ítrekað beitt þeim hótunum, að flóttamannabylgju verði hleypt í gegn, ef stjórn­mála­stétt Evrópu­ríkja situr ekki og stendur eins og honum þókknast.

Menn geta svo leitt getum að því (m.a. með hliðsjón af því, að erfitt er að þjóna tveimur herrum), hvort tugir milljóna annarra múslima í Evrópu hafi til að bera sam­bærilega afstöðu gagnvart lýðrétt­indum og lýðræðis­skipulagi búsetu­ríkja sinna eða vilja fylgja islömskum siðvenjum, m.a. sjaríalögum, en fjöldi sjaría­dómstóla er nú þegar við lýði í Bretlandi, Þýzkalandi o.fl. Evrópu­löndum, með sorglegum afleiðingum. Eitt er víst, að ekki styrkir þetta réttindi kvenna.

Við Íslendingar þekkjum fleiri en eitt dæmi um mikla erfiðleika íslenzkra kvenna, sem gifzt hafa múslimum og annaðhvort misst allt forræði barna sinna* eða verið nálægt því.**

* Sophia Hansen missti þannig af forræði sinna dætra og mestöllum samgangi við þær.

** Sbr. bókina Barist fyrir frelsinu eftir fjölmiðla­mógúlinn Björn Inga Hrafns­son (287 bls., Vaka-Helgafell 2002), en efni bókarinnar er lýst þannig á forsíðunni: "Áhrifamikil saga Guðríðar Örnu Ingólfsdóttur og Hebu Shahin og ævintýralegur flótti þeirra frá Egyptalandi."

Jón Valur Jensson.

Meirihluti Tyrkja í Evrópu sagði já

Eru islamistar að færa sig upp á skaftið í Svíþjóð? Blóðugt hryðjuverk skelfir Svía

Árásin á almenning í miðborg Stokkhólms í dag, með því að aka vöru­bíl inn í manngrúa, þar sem fjórir eru látnir og 15 særðir, setur hroll í Svía. Stefan Löfven, forsætisráðherra Svíþjóðar, hefur lýst þessu sem hryðju­verki. Einn gerandi hefur náðst og mun hafa játað á sig glæpinn (þessi viðbót skv. nýlegri frétt). Talið var, að heyrzt hefði af skothvellum í Stokkhólmi, en það er óstaðfest enn.

Er fyrir fram líklegt, að hinar gestrisnu móttöku­þjóðir múslima í álfunni sleppi við hryðjuverk? Ekki hefur reynslan sýnt það, og ekki er það heldur líklegt á Norðurlöndunum. Trúlega er nú komið að gestrisnasta landinu, Svíþjóð, að fá yfir sig hryðjuverk islamista. Sé svo, sjá menn væntanlega, að þessi grein var ekki að ósekju skrifuð: Er þagnar- og þöggunar-múrinn sænsk-íslenski loksins að rofna?

Þar mun koma, að áliti undirritaðs, að augu æ fleiri Íslendinga muni opnast fyrir þeirri staðreynd, að meiri­hluta­viðhorf gagnvart innflytjenda­málum hafa snúizt svo á síðustu misserum, að Evrópuþjóðir eru á einu máli með Íslensku þjóð­fylk­ing­unni um að stöðva beri straum múslima inn í Evrópu!

Gætum þess einnig, að Norðurlandabúar eiga greiðan aðgang til Íslands, m.a. til atvinnu hér og búsetu. Er okkur þar til að mynda ætlað það skyldu-hlutverk að meðtaka fólk af ólík­legasta uppruna og ofsa­trúar­menn þar á meðal sem Svía, Dani eða Norð­menn, hafi þeir fengið ríkisborgararétt í þeim löndum.

Lögreglan hér er nú þegar með Ísland á næsthæsta viðbún­aðarstigi gagnvart hryðjuverkum [1], og ekki dregur þessi sorgar­atburður úr þörfinni á fullri árvekni lögreglu­yfirvalda hér.

[1] Sbr. þessa grein: Tveir með tengsl við hryðju­­verka­­sam­tök óskuðu hér eft­ir alþjóð­legri vernd. Ísland gegn­um­streymis­land. Hryðju­verka­hætta á Íslandi enn "metin í meðallagi"

PS. Hér er eitthvað sýnt á myndbandi af vettvangi:

http://www.independent.co.uk/news/world/europe/stockholm-attack-latest-killed-shots-fired-lorry-truck-ahlens-mall-crash-crowd-sweden-people-a7672636.html

Jón Valur Jensson.

Stokkhólmur: Þetta vitum við

Nær 70% Breta fylgjandi Brexit - en Evrópu­sambandið reynir að leggja stein í götu Breta

Sam­kvæmt niður­stöðum nýrr­ar, víðtækr­ar skoðana­könn­un­ar YouGov telja 69% brezk stjórn­völd gera rétt með því að ganga úr Evrópu­sam­band­inu, aðeins 21% er and­vígt því og telur að koma þurfi í veg fyr­ir þau áform.

Þetta eru skýrar áherzlur og ættu að sýna þjóðarstuðning við stefnu Theresu May sem verður þó að glíma við harla ágenga og ófyrirleitna mótleiki Evrópu­veldisins (sjá hér neðar: Evrópusambandið reynir eftir megni að leggja stein í götu Breta).

Í fréttinni kemur fram, að

af þeim sem telja rétt að ganga úr Evr­ópu­sam­band­inu hafi 44% kosið með þeim hætti í þjóðar­at­kvæðagreiðslunni sem fram fór í Bretlandi síðasta sum­ar þar sem 52% kusu með því að yf­ir­gefa sam­bandið. Fjórðung­ur þeirra kusu gegn því að ganga úr Evr­ópu­sam­band­inu en telja engu að síður stjórn­völd gera rétt í ljósi niður­stöðunn­ar. (Mbl.is)

Þetta er líka mjög áhugavert um afstöðu Breta nú:

Tak­markaður er áhugi á því að halda annað þjóðar­at­kvæði um niður­stöður viðræðna Evr­ópu­sam­bands­ins og Bret­lands um úr­sögn lands­ins sam­kvæmt könn­un­inni. 45% telja að breska rík­is­stjórn­in eigi að klára málið án frek­ari aðkomu þings og þjóðar, 27% vilja annað þjóðar­at­kvæði og 15% vilja að þingið greiði at­kvæði um vænt­an­leg­an samn­ing.

For­sæt­is­ráðherra Bret­lands, Th­eresa May, hef­ur sagt að hún sé reiðubú­in að ganga frá samn­inga­borðinu ef ekki verði í boði nægj­an­lega góður samn­ing­ur. Eng­inn samn­ing­ur sé betri en slæm­ur samn­ing­ur. Meiri­hluti Breta er sam­mála þessu sam­kvæmt skoðana­könn­un­inni eða 55%. Tæp­ur fjórðung­ur tel­ur rétt að fall­ast á þann samn­ing sem verði í boði. (Mbl.is)

Th­eresa May, for­sæt­is­ráðherra Bret­lands. AFP

 

Leið Breta á að verða tvíhliða viðskiptasamningar

Enn­frem­ur er góður stuðning­ur við það með hvaða hætti May hyggst ganga úr Evr­ópu­sam­band­inu. Það er að sækj­ast eft­ir tví­hliða, víðtæk­um fríversl­un­ar­samn­ingi. Þannig telja 61% að leið for­sæt­is­ráðherr­ans virði niður­stöðu þjóðar­at­kvæðis­ins en 11% telja svo ekki vera. Tæp­ur helm­ing­ur, eða 49%, segj­ast ánægð með þá leið en fjórðung­ur óánægður.

Þá hafa fleiri trú á að May geti skilað góðri niður­stöðu fyr­ir Bret­land í viðræðunum við Evr­ópu­sam­bandið en þeir sem hafa það ekki eða 48% gegn 39%. (Mbl.is, nánar þar.)

Evrópusambandið reynir eftir megni að leggja stein í götu Breta

Viðbrögð ESB ættu að geta kennt Íslendingum einhverja lexíu - eða þeim sem ekkert höfðu lært af því, hvernig Brussel-valdaklíkan ætlaði að fara með okkur í makríldeilunni (að "úthluta" okkur 3,2% hlut í veiðunum á NA-Atlantshafi! - og um sama leyti setti ESB löndunarbann á Færeyinga!) og einnig í Icesave-málinu (að dæma á okkur, saklaus, fulla greiðslu­skyldu vegna þeirra reikninga í einka­banka!!!). Bretar hefðu líka mátt búast við svipuðum trakter­ingum af þessum fyrrum samlags­mönnum sínum.

Stórveldasambandið hefur þegar krafið Breta um greiðslu 50-60 milljarða evra vegna úrsagnarinnar, andvirði um 6.000-7.000 milljarða íslenzkra króna! (sbr. erlend skrif hér).

Þá berast fregnir af því, að Evr­ópu­sam­bandið krefst þess nú, að Bretlandi „verði nægj­an­lega ágengt“ í skilnaði sín­um við sam­bandið, áður en viðræður um viðskipta­samn­ing þeirra á milli geti haf­izt! - en þessi kraf­a kemur fram í viðræðuáætlun­um ESB sem birt­ar voru í morg­un (Mbl.is segir frá þessu í annarri frétt að morgni 31. marz: ESB verður ekki við ákalli May). Sbr. einnig hér: ESB vill bolast áfram með harðri valdbeitingu gegn Bretum vegna Brexit.

Hvort minnir þessir erfiðleikar Breta ekki á fleygan kviðling Jóns prófessors Helgasonar í Árnasafni í Kaupmannahöfn:

Sú þjóð sem veit sér ekkert æðra mark

en aurasníkjur, sukk og fleðulæti,

mun hljóta notuð herra sinna spark

og heykjast lágt í verðgangsmanna sæti.

Sú þjóð sem dottar dáðlaus, viljasljó,

og dillar þeim er ljúga, blekkja, svíkja,

skal fyrr en varir hremmd í harða kló.

Hægt er að festast, bágt mun úr að víkja!

 

Undirstrikun hér!

Jón Valur Jensson.

Telja rétt að ganga úr ESB

Marine Le Pen - flottur upprennandi þjóðarleiðtogi?

Marine Le Pen er farin að sýna á sér þjóðhöfðingjasnið, með heimsókn sinni í Kremlarhöll til Valdimírs Pútín, þótt rangt sé að taka það sem beinan stuðn­ing hans við hana; hann undir­strikar að þar sé oft tekið á móti stjórn­ar­and­stöðu­mönnum frá ýmsum löndum. En eftir fundinn með Pútín hvatti frú Marine til þess að bundinn yrði endi á efnahagslegar refsi­aðgerðir Evrópu­sambandsins og Bandaríkjanna gegn Rússlandi. Fyrri umferð forseta­kosn­ing­anna í Frakklandi fer fram 7. apríl nk. Og það er nánast hnífjafnt milli Le Pen og helzta keppinautar hennar, Macrons. Meira af því seinna.

Einhver gæti haldið Íslensku þjóðfylkinguna augljós systursamtök hinnar frönsku Þjóðfylkingar (Front national) frú Le Pen, en það er ekki rétt, og enskt nafn okkar er The National Icelandic Alliance, ekki National Front. Með því er líka vísvitandi sneitt hjá öllum hernaðar- eða vígalegum hugrenninga­tengslum orðsins "front"! Við viljum fylkja fólki saman um sjálfstæði lands og þjóðar.

En við í ÍÞ erum mjög ánægð með það, að frú Marine gerði alla rasista og fasista brottræka úr flokknum,* rétt eins og Svíþjóðardemókratar gerðu það sama við of róttæk ungmennasamtök sín árið 2015.** Við söfnum ekki ruslara­lýð í Íslensku þjóðfylkinguna, heldur sönnum þjóðarvinum og baráttufólki fyrir réttlátum kjörum alþýðu.

* Hún losaði sig jafnvel við sinn eigin föður úr flokknum vegna ofurróttækni hans! En rammhlutdrægur "fréttamaður" RÚV, Kári Gylfason, var rétt í þessu að lýsa Marine Le Pen sem "þjóðernis­popúlista [sem] þykir hafa öfgafull viðhorf" og eitt af þeim kaus hann svo greinilega að nefna í næsta orði: að hún vilji úrsögn Frakklands úr Evrópusambandinu! En eru það öfgar?!

** Í framhjáhlaupi má geta þess, að skv. nýjustu skoðanakönnun Dagens Ny­heter og sænska sjónvarpsins eru Svíþjóðar­demókratar orðnir næststærsti flokkur landsins, komnir yfir Hægri flokkinn (18%) með heil 19,2%. Svíþjóðar­demókratar stofnuðu sinn flokk 1988, en náðu ekki inn á þing (yfir 4% múrinn) fyrr en 2010. --Já, þjóðlegum flokkum í Evrópu vex hratt fiskur um hrygg á síðustu árum vegna óábyrgrar innflytjendastefnu þýzkra, norrænna og niður­lenzkra krataflokka og annarra meðvirkra flokka sem hanga gjarnan í pilsfaldi Evrópusambandsins.

Jón Valur Jensson.

Pútín fundar með Le Pen

Donald Trump yngri gagnrýnir Sadiq Khan, borgarstjóra Lundúna, vegna ummæla hans um hryðjuverkaárásir sem nánast normal þátt í borgarlífi

Hér um vísast til pistils sem birtur var á þessu bloggi í dag. Umræðan þar var áhuga­verð um sumt, eins og hrika­leg hryðju­verk öfga­islamista í Bret­landi. Þeim mun hneyksl­an­legri eru ummæli þessa borgar­stjóra, en eitt er víst, að ekki veldur hann islamistum vonbrigðum með þessum þægðarlegu orðum sínum; menn geta svo velt því fyrir sér, hvort hann er meðvirkur með hatursöflum meðal róttækustu fylgismanna Múhameðs.

En skoðið þetta, þið sem misstuð af þeirri umræðu: Múslimskur borgarstjóri Lundúna talar um hryðju­verkaárásir sem nánast eðlilegan þátt í borgarlífi!

Jón Valur Jensson.

ESB vill bolast áfram með harðri valdbeitingu gegn Bretum vegna Brexit

Frétta­vef­ur Guar­di­an seg­ir ráðamenn ESB hafa varað ea­syJet, Ry­ana­ir og Brit­ish Airways við að flug­fé­lög­in þurfi að flytja höfuðstöðvar sín­ar og selja hluta­bréf til rík­is­borg­ara ESB svo ekki verði breyt­ing­ar á flug­leiðum þeirra. (Mbl.is)

Þannig er þá brezk­um flug­fé­lög­um ráðlagt að flytja höfuðstöðvar sín­ar til ríkja ESB fyr­ir út­göngu Bret­lands úr Evr­ópu­sam­band­inu, vilji þau halda flug­leiðum sín­um inn­an ESB óbreytt­um eft­ir út­göng­una, skv. sömu frétt. 

Guar­di­an seg­ir stjórn­end­ur stærstu flug­fé­lag­ana hafa verið minnta á lokuðum fund­um með ráðamönn­um ESB, að til þess að halda áfram flug­leiðum inn­an ríkja ESB, t.d. á milli Mílanó og Par­ís­ar – þá verði um­fangs­mik­ill hluti starf­semi þeirra að vera inn­an ESB og að meiri­hluti hluta­bréfa verði sömu­leiðis að vera í eigu rík­is­borg­ara ESB. (Mbl.is)

Hér er í raun verið að knýja Breta til að svara í sömu mynt. Í stað þess að vera það rómaða fríverzlunarsamband, sem ESB-menn geipa af, vilja þeir í raun hefja viðskiptastríð við Stóra-Bretland, kannski til að svala hefnigirni, kannski í þeirri von, að þeir geti svínbeygt brezka ljónið.

Aðeins nokkr­ir dag­ar eru nú þar til Th­eresa May, for­sæt­is­ráðherra Bret­lands, hyggst virkja 50. grein Lissa­bon sátt­mál­ans og hefja þar með form­lega út­göngu Breta úr ESB. Guar­di­an seg­ir þá ákvörðun auka á lík­ur þess að flug­fé­lög­in verði við kröf­um ESB og end­ur­skipu­leggi starf­semi sína, sem að öll­um lík­ind­um hafi efna­hags­leg­ar af­leiðing­ar fyr­ir Bret­land, m.a. með fækk­un starfa. (Mbl.is)

Ja, hér er álit Guar­di­ans á framhaldinu:

Guardian tel­ur að bú­ast megi við að bresk stjórn­völd sína sam­bæri­lega óbil­girni og að lík­legt sé að þau setji sín­ar eig­in regl­ur sem muni gera evr­ópsk­um flug­fé­lög­um erfiðara um vik að stunda starf­semi í Bretlandi.

Friðarspillirinn ESB heldur áfram að vera sjálfgum sér til skammar. Gagnvart Íslendingum hefur þetta bandalag margbrot á okkur lög og rétt, bæði í Icesave-málinu og makrílveiðimálunum. Engin furða, að allir íslenzkir stjórnmálaflokkar með snefil af sjálfsvirðingu hafna "ESB-aðild", en því miður eru þeir allt of fáir, sem sýna þá einurð, þá þjóðhollustu. Einarðasti flokkurinn í ESB-andstöðunni er einmitt Íslenska þjóðfylkingin.

Grein sérfræðings: Independent Iceland teaches a great deal, fær mikinn uppslátt í Sunday Times um síðustu helgi og sýnir svo með óefanlegum hætti, að Ísland hafði allan hag af því að vera utan ESB í bankakreppunni, en Írland allan skaða af því (og hann ekki lítinn) að vera þá í þessu valdfreka ríkja­bandalagi. Leiðtogar landsins hlustuðu illu heilli á þau ráð Trichets, bankastjóra Evrópska seðlabankans, að írsk stjórnvöld yrðu að koma í veg fyr­ir að bank­ar færu í þrot, en til þess varði írska ríkið 65 millj­örðum evra (rúm­lega 7.700 millj­örðum króna) af skatt­fé almennings! Stór hluti þess fjár­magns hafi endað í vös­um kröfu­hafa bank­anna, segir í Sunday Times-greininni. 

Ekki verður sú grein til þess að draga úr vilja Breta til að varðveita sem bezt sjálfstæði sitt! Sjá nánar hér á Fullveldisvaktinni: Írland og Ísland: Fengum að heyra það: Við fórum leiðina réttu, einmitt ekki írsku hrakfalla­leiðina!

Jón Valur Jensson.

Bresk flugfélög flytji til ESB vegna Brexit

Gylfi Arnbjörnsson: persona non grata?

Athygli vekur, að sigur­vegarinn í for­mennsku­kjöri í VR, Ragn­ar Þór Ing­ólfs­son, afþakkar sæti í miðstjórn ASÍ, meðan Gylfi Arn­björns­son er þar forseti. Hvöss svör Gylfa í Sjón­varpi skilj­ast vel af hans eigin hag!

Ekki þarf að gera manninn útlægan, þótt eflaust myndi hann una sínum hag vel í Brussel. En lítum á þessi atriði, sem sýna, að það er löngu kominn tími til að hann sleppi sínu tangarhaldi á verkalýðshreyfingunni eða verði sviptur völdum:

1. Þessi hagfræðingur er á forstjóra-ofurlaunum sem forseti ASÍ - senni­lega með langt yfir eina og hálfa milljón á mánuði. Hvernig getur slíkur maður borið ærlegt skynbragð á kjör fólks, sem jafnvel þarf að fram­fleyta sér á um eða undir 200.000 kr. á mánuði eftir skatta? Ólíkt Gylfa var eitt fyrsta verk Ragnars Þórs að lækka eigin formannslaun í VR um 300.000 kr. á mánuði.
2. Gylfi er virkur baráttumaður, á sínum vettvangi með margvíslegum hætti, fyrir innlimun Íslands í erlent stórveldi, Evrópusambandið. Í þessu skyni er ýtt undir það innan varkalýðshreyfingarinnar að senda menn í löngum röðum í Brusselferðir, með miklum dagpeningum, glæsi-uppihaldi og fríðindum, eins og m.a. Jón Bjarnason, fyrrv. ráðherra, hefur upplýst um í afar fróðlegri Fréttablaðsgrein, en allt slíkt stuðlar að því að veikja viðnámsþrótt þeirra fulltrúa verkalýðsfélaganna, sem fara í slíkar ferðir, og má kenna þetta við mútu­starfsemi á vegum stórveldis, en hér með þegjandi samþykki og samvinnu verkalýðsforingja undir forystu ESB-mannsins Gylfa Arnbjörnssonar.
3. Í takt við sína undirgefnisafstöðu gagnvart Evrópusambandinu tók hag­fræðingurinn Gylfi Arnbjörnsson afstöðu GEGN ÞJÓÐARHAG og GEGN LAGALEGUM RÉTTI ÍSLENDINGA í Icesave-málinu, sbr. hér á vef Þjóðar­heiðurs, samtaka gegn icesave: Þau studdu hinn ömurlega Icesave-II-samning og líka Icesave-III-samninginn!
4. Ragnar Þór segir að fenginni reynslu, að honum hafi þótt for­seti ASÍ ekki vera í neinu sam­bandi við vilja fólks­ins í land­inu og sá grun­ur hafi reynzt vera rétt­ur. "Ég bauð mig fram á móti hon­um og hef gert það þris­var sinn­um, til þess að sýna al­menn­ingi í land­inu hversu mik­ils stuðnings hann nýt­ur á meðal þessa þrönga hóps sem er val­inn inn á þing sam­bands­ins.“
5. Gylfi Arnbjörnsson er einn þeirra sem bera höfuðábyrgð á ólýðræðislegu kosningakerfi til stjórna verkalýðsfélaga og til bæði Alþýðusambands Íslands og lífeyrissjóðanna. Afar þunglamalegt kosningakerfi, með miklum kröfum um fulla lista og fjölda meðmælenda, gera sjálfsprottin framboð nær óhugsandi, og tilgangurinn virðist vera að varðveita hags­munastöðu valdaklíku, sem hefur komið sér vel fyrir innan samtakanna, og jafnvel misnotkun þeirra til hálauna og bitlinga.
6. Þá ber Gylfi einnig ábyrgð á því að hafa ekkert gert til að losa um tök atvinnurekenda á þeirri eign verkafólks, sem geymd er í lífeyrissjóðum landsins. Með setu margra foringja verkalýðsfélaganna í stjórnum líf­eyr­issjóða fá þeir ekki aðeins tækifæri til að smyrja ofan á laun sín, heldur eru einnig komnir í samkrull við atvinnu­rekendur, eru á fundum með þeim og að njóta lífsins með þeim í fríum sínum, þess vegna í utanlands­ferðum og í dýrum laxveiðiám.
7. Ekki hafa Gylfi og félagar tekið við sér, þegar Ragnar Þór og samherjar hans hafa lagt til, að líf­eyr­is­sjóðirn­ir komi að lausn hús­næðismála al­menn­ings með bein­um hætti, t.a.m. með því að "leggja fjár­magn í upp­bygg­ingu leigu­fé­laga og bygg­ingu íbúða sem seld­ar væru á kostnaðar­verði eða með hóf­legri álagn­ingu," eins og Ragnar gerir tillögu um. "Hann vill enn­frem­ur að lög­um verði breytt þannig að slík sam­fé­lags­verk­efni væru ekki háð arðsem­is­kröfu." (Mbl.is) „Ég er ekki að leggja það til að líf­eyr­is­sjóðirn­ir hendi pen­ing­um í ein­hver gælu­verk­efni þar sem þeir muni tap­ast að öllu leyti. Ég er ein­göngu að tala um að sjóðirn­ir komi með þol­in­mótt fjár­magn tíma­bundið inn í slík verk­efni sem væru ekki hagnaðar­drif­in og breyta þeim síðan yfir í sam­vinnu­fé­lög með tíð og tíma og sjóðirn­ir fengju þá sitt fjár­magn til baka,“ segir hinn skynsami og sanngjarni Ragnar Þór.
8. Þá hefur Gylfi Arnbjörnsson vanrækt einn al-erfiðasta kjaramálaþátt alþýðu: vaxta- og verðtrygg­ing­ar­mál­in -- tekur hvorki undir kröfur um afnám verðtryggngar né um lækkun stýrivaxta og íbúðalánavaxta. (Krafa Þjóðfylkingarinnar er þar um afnám verðtryggingar, en ella um 2% vaxtaþak á íbúðalán. Af 15 millj. kr. láni hjá Íbúðalánasjóði myndi þessi lækkun úr 5% verðtryggðum vöxtum í 2% verðtryggða vexti þýða lækkun vaxtanna úr 48.719 kr. á mán. í 19.488 kr. Sparnaðurinn af því eina láni yrði þannig hátt í 30.000 kr. á mánuði! Fjölskyldur munar um minna! En gegn slíkri lækkun standa hinir eilífu augnakarlar: Már Guðmundsson og Gylfi Arnbjörnsson!) -- Ragnar Þór segir, að ít­rekað hafi verið reynt að fá álykt­an­ir samþykkt­ar á þing­um ASÍ um afnám verðtrygg­ingar, en þær hafi verið útþynnt­ar af ASÍ vegna þess að það henti ekki stefnu þeirra sem ráðið hafi ferðinni inn­an sam­bands­ins.

• „Stefna þeirra í þess­um mál­um hef­ur verið að leysa lána- og vaxta­mál­in með því að ganga inn í Evr­ópu­sam­bandið og taka upp evru,“ segir Ragnar Þór í þessu sambandi. "En launa­fólk og al­menn­ing­ur í land­inu á ekki að þurfa að hafa byssusting­inn í bak­inu. Við eig­um að geta tekið slíka ákvörðun með upp­lýst­um hætti. Það á ekki að nota ástandið gegn launa­fólki því við get­um gert miklu bet­ur."
• Ragn­ar vís­ar þar til margít­rekaðrar stefnu ASÍ og til að mynda Sam­fylk­ing­ar­inn­ar að ekki sé hægt að af­nema verðtrygg­ingu af lán­um nema með inn­göngu í Evr­ópu­sam­bandið og upp­töku evru. Ragn­ar tek­ur fram að hann hafi ekki tekið af­stöðu til Evr­ópu­sam­bands­ins sjálf­ur en hann telji rangt að stilla launa­fólki upp við vegg með þess­um hætti. 
• „Þarna er um að ræða margít­rekaða stefnu bæði Sam­fylk­ing­ar­inn­ar og ASÍ og þar á milli eru mik­il tengsl. Þannig að maður hlýt­ur að draga þá álykt­un að verið sé að nota sér þetta ástand til þess að afla sér meira fylg­is við þessa risa­stóru póli­tísku ákvörðun sem felst í því að ganga í Evr­ópu­sam­bandið og taka upp evru. Það er bara allt önn­ur umræða.“ (Mbl.is)

Af síðustu klausunum hér má ráða, að Gylfi Arnbjörnsson hafi beitt sér fyrir vagn Samfylkingarinnar í þessum ESB-málum, en trúlega á hann einnig sína tengla sjálfur í Brussel.

Það er fagnaðarefni, að sjálfstætt hugsandi verkalýðsforingi, nefndur Ragnar, mikill grasrótarmaður, hefur tekið við formennsku í stærsta verkalýðsfélagi landsins og bætist þar í hóp ágætra hugsjónamanna eins og Vilhjálms Birgissonar á Akranesi og Aðalsteins Baldurssonar á Húsavík.

Jón Valur Jensson.

Sest ekki í miðstjórn ASÍ með Gylfa

Eru 80% Íslendinga þá rasistar?

Athygli og góðar undir­tektir fær hvöss ádrepa á DV.is í um­ræðu um ÍÞ:

María Magnúsdóttir, hjúkr­unar­fræð­ingur í Kefla­vík, ritar:

Hef verið í stjórn ÍÞ frá upphafi. Þar er engan ras­isma né fas­isma að finna. Þegið þið sem ekki vitið hvað þið bullið um! Flokkurinn vill stemma stigu við islamiseringu og er með mörg önnur mjög góð málefni sem aðrir flokkar tóku síðan upp eftir ÍÞ.

 

Þjóðernisflokkar eru flokkar sem vilja hjálpa þeim sem VIRKI­LEGA þurfa hjálp en ekki ryðja inn gervi­flótta­mönnum eins og stjórnvöld gera nú. Talandi um rasista, eru þá 80% þjòðarinnar rasistar því skv. könnun sem var gerð á sl ári eru 80% Íslendinga á móti mosku­bygg­ingu. Þið hljótið þá að vera sammála því! ??? NEI, ekki rasistar en bara fólk með glóru í hausnum. 

Þið viljið náttúr­lega að Ísland verði eins og Svíþjóð og fleiri lönd í Evrópu. OK, þá skuluð þið bara fá þann pakka. Það gæti alveg orðið einn úr ykkar fjölskyldu sem lendir í fyrsta ódæðisverkinu. Við skulum bara ræða saman þá, það lækkar í ykkur rostinn og kjaft­urinn þegar ballið byrjar. 

Eini flokkurinn sem þorði að tala gegn hryðju­verka­vá og tala af viti um innflytj­endamál var ÍÞ. Það gerði Sigmundur Davìð líka, Davíð Oddsson, Ingibjörg Sólrún og Björn Bjarnason. Af hverju kallið þið þau ekki rasista??. Enginn vill þá þróun hér sem er orðin í Evrópu en fólk er hrætt við svona fólk eins og ykkur o.fl. sem rífið kjaft og dæmið það sem þið vitið ekkert um. Fólk sem þorir ekki að tala af ótta við rasista­stimpilinn en er ósátt. 

 

Velferðar­kerfið springur og allt fer hér á annan endann með þessari fasista­stjórn sem nú situr við völd. Hvar er þjóðar­atkvæðið um mosku, áfeng­is­frumvarpið og útlendinga­lögin?? Þið sem hér mælið hluti út í loftið vitið greinilega ekki allan sannleikann um það af hverju ÍÞ fór svona. Fyrir því voru nokkrar ástæður en sumar ljótari en aðrar, áhlaup o.fl. sem aldrei var í raun upplýst fyrir alþjóð, svo endaði þetta með Hörpu­fundinum, flugelda­sýningunni sem varð þess valdandi að fylgið hrundi úr 3,2% niður í ekkert... öðruvísi gat það ekki farið....

Við tölum saman þegar ballið byrjar hér en það er reyndar byrjað í róleg­heitum, en kæru landar, það á ekki að segja ykkur sannleikann. Það er búið að taka upp Svíþjóðarleiðina þannig að ef innflytjandi fremur glæp er reynt að þagga hann niður. Þetta kallar maður að elska land sitt og þjóð... er þaggi?? Svona mikla umhyggju bera núverandi stjòrnvöld fyrir ykkur, kæru saklausu og blekktu landar. Enginn flokkur er fullkominn, hvorki ÍÞ né fjórflokkurinn, en eitt er víst að þjóð­ernis­flokk vantar á Íslandi, hvaða nafni sem hann nefnist. Þetta eru ENGIR rasistaflokkar heldur flokkar sem vilja vernda YKKUR öll... blekkt af fjölþjóða­væðingunni sem er búin að drepa Evrópu. Af hverju skyldu annars þjóðernisflokkar vera sterkustu flokkar álfunnar...ha ?? Því að fólk er búið að fá nóg af hryðjuverkum og ótta og ófriði. Það vill löndin sín til baka. Spyrjum að leikslokum, vinir!

Uppskrift sænskra pólitíkusa veldur því hve bumbult þeim verður

Það þýðir lítt fyrir Löf­ven, for­sæt­is­ráðherra Svía, og Bildt fyrirrennara hans að láta sem þeir viti ekki um slæm áhrif inn­flytj­enda­stefnu þeirra. Sama dag og þeir börðu sér á brjóst og gerðu lítið úr Trump fyrir "fá­fræði" hans, tóku óeirða­seggir að grýta lög­reglu (í 100. sinn a.m.k.), kveikja í bílum og sanna ná­kvæm­lega það, sem Trump var að tala um, og það í sjálfri höfuðborginni Stokkhólmi!

Félagslega séð er augljóst að Svíar hafa ekkert kunnað á neina aðlögun, enda flestir innflytj­endanna (yfir tvö hundruð þúsund) enn atvinnu­lausir. Þetta er sama auðvelda uppskriftin og Frakkar höfðu áður upplifað að megnri ófullnægju ungs fólks og annarra, gremju sem býzt út í andfélagslegu hátterni, og ekki er til bóta að menn í leit að samstöðu hverfi inn á við í arfleifð islams þar sem karlremba og fjarstýring kvenna eru meðal fylgifiska trúar­innar og jafnvel skelfilega hluti hefur leitt af harðlínu­stefnu islamista. Meira að segja frá skandinavísku löndunum öllum hefur Ríki islams í Sýrlandi og Írak fengið efni í bæði stríðsglæpamenn og fallbyssu­fóður. Nú eru þeir víða að hrekjast undan sókn Sýrlands­hers og Írakshers, og það lítur ekki friðvænlega út fyrir evrópsku heimabyggðirnar að fá þá aftur. Og menn þjálfaðir í ofstækisfullri, vopnaðri baráttu munu í hvaða landi sem er finna sér átyllu til ógnarverka.

Eins og öllum upplýstum á að vera kunnugt, var Donald Trump alls ekki að tala um nein "hryðjuverk" í Svíþjóð og heldur ekki "árásir". En hann var að vísa í afar slæm áhrif þess, að Svíar hleyptu inn 165.000 flótta­mönnum og hælis­leit­endum á einu ári og horfa nú upp á fjölgun glæpa í kjölfarið. Jafnvel í Noregi og Danmörku hefur fjölgað glæpum gegn konum, einkum ungum, en líka með sárustum hætti gegn stúlkubörnum, sem fá til sín í heimsókn umskurð­ar­konur sem skemma þær fyrir lífstíð og valda sárum harmi, eins og séra Arndís Ósk Hauksdóttir, sveitarprestur í Noregi og félagi í Íslensku þjóðfylk­ing­unni, upplýsti vel um í viðtali við Edith Alvarsdóttur í Útvarpi Sögu sl. föstudag, 17. þessa mánaðar.

En allt er Trumpsmálið nýjasta til hneisu fyrir marga fjölmiðla, hér á landi einkum hina rammhlutdrægu fréttastofu RÚV og Morgunblaðið (sbr. blogg undirritaðs og einnig Gústafs Skúlasonar, Gunnars Rögnvaldssonar og Halldórs Jónssonar verkfræðings).

Hér á Ásgrímur Hartmannsson fróðleg, ný fréttamyndbönd, norskt og frá CNN, um það upplausnarástand sem aðsigi er í Svíþjóð, og flott lögreglan er ekkert að fela það: Ég er hinsvegar ekkert undrandi heitir samantekt hans á þeim fróðlegu fréttamyndböndum.

Jón Valur Jensson.

Undrandi á ummælum Trumps

Marine Le Pen: AFEITRAÐI frönsku Þjóðfylkinguna, hafnar öfgum og kynþáttahatri

Jafnvel Fréttablaðið viðurkennir, að flokks­leiðtog­inn Marine Le Pen hefur "af­eitrað flokk­inn og óspart rekið úr honum liðs­menn sem hafa sýnt af sér gall­harð­an þjóð­ernis­hroka eða boðað grímu­laust kyn­þátta­hatur eða Gyðingahatur."

Hófstillt stefna Marine Le Pen nær betur til frönsku þjóðarinnar en æsingaræður föður hennar, sem lét af forystu flokksins árið 2011, þá kominn yfir áttrætt. Hún er þó hörkutól gagnvart Evrópusambandinu, vill a.m.k. endurheimta þau full­veldisréttindi Frakklands sem afsalað hafði verið til Brussel, þótt vilji hennar sé raunar eindreginn í þá átt að landið segi sig úr ESB. Hún vill að óska­gjald­miðill íslenzkra vinstri manna og ESB-innlim­unar­sinna verði lagður niður: 

"Evran er ekki gjaldmiðill. Hún er pólitískt vopn. Evran er hnífur sem Evrópu­sambandið stingur í bakið á fólkinu til að neyða það til að fara þangað sem það vill ekki fara."

Nú er Marine aftur komin í forsetaframboð og mun njóta stuðnings a.m.k. fjórða hvers kjósanda. Ýmsir leiðtogar vinstri og hægri flokkanna hafa hrapað í áliti, Hollande forseti reynzt afleitlega, fjármála­hneyksli kippt fótunum undan jafnt hægri manninum Fillon sem öðrum.

Þá hafa hryðjuverk múslimskra öfgamanna aukið mjög fylgi Þjóðfylkingarinnar á ný, en í Frakklandi eru 5-6 milljónir múslima, og greinilega hefur ýmsum þeirra ekki tekizt að aðlaga sig frönsku þjóðfélagi og gildum. Áberandi er einnig Gyðingahatrið meðal öfgamúslima, og hafa sum hryðjuverkin beinzt að þeim, saklausum borgurum landsins, og hefur það jafnvel stuðlað að brottflutningi Gyðinga til Ísraels.

Full þörf er á því um alla Evrópu, að ríkisstjórnir þar taki raunsætt mið af því, að yfir 70% þeirra, sem afstöðu taka í skoðanakönnun Chatham House í 10 af helztu Evrópuríkjum, eru hlynnt því að stöðva þar móttöku fleiri múslima. 

PS. Opinbert, enskt heiti Íslensku þjóð­fylkingar­innar er the National Alliance. Við notum ekki hugtakið National Front, sem hefur hernaðarlegan hljóm (minnir á herfylkingu) og var í sumum Evrópulöndum á stundum tengt nýnazisma. Íslenska þjóðfylkingin fordæmir allan fasisma og kynþáttaandúð.

Jón Valur Jensson.