Hæli Mótmæli hælisleitenda.
 
Hat­urs­glæp­ir og -tján­ing hef­ur á und­an­förn­um árum fengið aukna at­hygli í Evr­ópu, en hat­ur­stján­ing er orðræða sem er al­mennt beint gegn ein­hverju, t.a.m. trú­ar­brögðum, kyn­hneigð eða upp­runa,"
segir fyrst í fréttinni. Þá er fullyrt þar:
 
Ákveðið for­dæmi hef­ur verið gefið í ís­lensku sam­fé­lagi sem skap­ar rými fyr­ir tján­ingu nei­kvæðra viðhorfa gegn minni­hluta­hóp­um sem kynda á und­ir hatri milli hópa og mis­mun­un.

Eru þetta m.a. niður­stöður rann­sókn­ar sem birt er í fræðirit­inu Stjórn­mál & stjórn­sýsla und­ir heit­inu „„Grýta þetta pakk“: Hat­ur­stján­ing í ís­lensku sam­hengi“. Var rann­sókn­in unn­in af Eyrúnu Eyþórs­dótt­ur, lektor við hug- og fé­lags­vís­inda­svið Há­skól­ans á Ak­ur­eyri, og Krist­ínu Lofts­dótt­ur, pró­fess­or í mann­fræði við Há­skóla Íslands.

Þetta eru sem sé þeirra "niðurstöður", en hver eru sönnunargögnin?

„Þessi orðræða er notuð til að stilla minni­hluta­hóp­um upp sem ógn gegn ís­lenskri menn­ingu, „hvíta kyn­stofn­in­um“, kon­um og ör­yggi sam­fé­lags­ins. Orðræðan bein­ist að mestu leyti gegn múslim­um. Ein­stak­ling­ar sem halda úti orðræðu sem þess­ari hafa í sum­um til­fell­um bein­an aðgang að fjöl­miðlum í gegn­um eign­ar­hald og stjórn­un miðlanna þar sem fals­frétt­um er meðal ann­ars miðlað,“ seg­ir í "rann­sókn­inni".

 

Nú þegar hafa helztu stjórnendur Útvarps Sögu, eigandinn  Arnþrúður Karlsdóttir útvarpsstjóri og Pétur Gunnlaugsson lögfræðingur, aðal-þáttagerðarmaður þar, séð þetta meint sem gagnrýni á þá útvarpsstöð og þau hafnað þessu með öllu. Aldrei minnist undirritaður þess að hafa heyrt þau upphefja þar "hvíta kyn­stofn­inn" á kostnað annarra, hvað þá miðlað falsfréttum. Erlend fréttamiðlun þeirra er m.a. reglulega frá Svíþjóð, þar sem vel þekktur Íslendingur (m.a. af mörgum Morgunblaðsgreinum og góðri þátttöku hans þar og á bloggvefjum í baráttunni gegn Icesave-samningunum og gegn ólögmætu Össurar-umsókninni um innlimun í Evrópusambandið), Gústaf Adolf Skúlason, hefur verið búsettur nærri Stokkhólmi um áratuga skeið og flutt okkur ýtarlegar fréttir af versnandi ástandi þar í landi í kjölfar mikillar innflytjendabylgju þar, yfir milljón manns.

Eyrún haturslögga hefur látið mynda sig skælbrosandi með kunningja sínum Salmann Tamimi, forstöðumanni múslima­safnaðarins sem hyggst (með sádi-arabísku stuðningsfé?) reisa mikla mosku í Sogamýri, milli Miklubrautar og Suðurlands­brautar, austan þjónustu­húsanna í Mörkinni, og mun hún blasa við þeim sem koma akandi til Reykjavíkur. En þessi Salmann er einmitt þekktur fyrir sín þríendur­teknu ofbeldislegu ummæli hér á landi, að hann sé hlynntur því ákvæði Kóransins sem kveður á um handarhögg þjófa!

Í slíkum félagsskap er Eyrún sú, sem þykist vera að leita uppi hatursorðræðu, en orðið lítt ágengt með það í sínum mörgu árangurslausu tilraunum! Ætti hún ekki að líta sér nær?

Og takið eftir þessu:

"Rann­sak­end­ur halda því einnig fram að sömu orðræðu sé að finna inn­an stjórn­mál­anna hér á landi, en stjórn­mála­flokk­arn­ir Íslenska þjóðfylk­ing­in og Frels­is­flokk­ur­inn eru meðal ann­ars stofnaðir „sér­stak­lega gegn inn­flytj­end­um, múslim­um og fólki sem leit­ar alþjóðlegr­ar vernd­ar. Jafn­vel þótt fylgi þess­ara flokka hafi ekki náð miklu flugi hingað til hafa þeir góðan aðgang að fjöl­miðlin­um Útvarpi Sögu til að dreifa hat­urs­áróðri,“ seg­ir í rann­sókn[inni], en einnig eru full­trú­ar Flokks fólks­ins og Miðflokks­ins bendlaðir við hat­urs­tján­ingu í um­ræddri rann­sókn." (Morgunblaðið flytur okkur þessa furðufrétt nú stuttu fyrir jól, 18. des. 2019.)

Hér ber haturslöggan í akademíska dulargervinu og stalla hennar Krist­ín Lofts­dótt­ir þá gróflega lognu ásökun á flokk minn, Íslensku þjóðfylkinguna, að hún hafi verið stofnuð "sérstaklega gegn inn­flytj­end­um, múslim­um og fólki sem leit­ar alþjóðlegr­ar vernd­ar". Hún segir fréttirnar, þessi Eyrún! Ekki var ég, sem á þó sæti í stjórn ÍÞ og sat stofnfund hennar, mér nokkurn tímann meðvitaður um að þetta hafi verið stofnmarkmið flokksins!! En sömu ásökun bera þær á hendur Frelsisflokksins og gefa svo "full­trú­[um] Flokks fólks­ins og Miðflokks­ins" hlutdeild í sama meinta glæp með því að segja þá "bendlaða við hat­urs­tján­ingu" í meintri rann­sókn sinni.

Hér er aftur til að svara, að Þjóðfylkingin hefur fordæmt alla kynþáttahyggju (racisma) og útlendingaandúð (xenophobiu) og tekur enga fjandsamlega afstöðu gegn inn­flytj­end­um sérstaklega, enda eru t.d. ýmsir stjórnarmenn flokksins með fjölskyldu­meðlimi af öðru þjóðerni og kynþáttum (það á t.d. við um fimm meðal barna minna að meðtöldum tveimur tengdadætrum, en þar að auki var fyrrverandi tengdasonur minn frá Afríku).

Dömurnar tvær í Háskólanum á Akureyri segja Þjóðfylkinguna ennfremur stofnaða "sér­stak­lega gegn ... múslim­um og fólki sem leit­ar alþjóðlegr­ar vernd­ar." En það er hvergi minnzt á þá í stofn­skrá flokksins, þetta er ekki fundið út með faglegri, akadem­ískri rannsókn, heldur er það heimaafurð þessara tveggja kvenna!

Frelsisflokkurinn getur vitaskuld varið sig sjálfur, sem og Flokkur fólksins og Miðflokk­urinn, gegn hinum fáheyrðu, opinberlega tilkostuðu ásökunum þessara tveggja harðlínukvenna, sem blanda saman eigin pólitískri afstöðu og stefnu stjórnmála­flokka í landinu. Eins og Pétur Gunnlaugsson undir­strikaði skýrt í viðræðuþætti sínum fyrir og eftir kl. 10 í morgun, hefur Flokkur fólksins einkum barizt gegn fátækt og illu hlutskipti öryrkja og lífeyrisþega og verður ekki með neinum eðlilegum hætti "bendlaður við hat­urs­tján­ingu."

Sömuleiðis kemur það eins og þruma úr heiðskíru lofti að sjá Miðflokkinn bendlaðan við "hat­urs­tján­ingu" -- aftur á móti verður hann sjálfur og fulltrúar hans á þingi og í borgar­stjórn oft fyrir óvægilegum skæru­hernaði af hálfu sumra fjölmiðla­manna, m.a. með háði og affrægingu, t.d. í víðlesnum pistli á leiðara­síðu Frétta­blaðsins. En þær stöllurnar amast ekki við því, að reynt sé að skapa þar uppvaxandi andúð meðal lesenda blaðsins, það sé bara gott og gilt, að ætla mætti!

Og "fréttin" í Mbl. endar svona:

Þá sýn­ir upp­gang­ur hat­urs­hópa á borð við Norður­vígi og Vak­ur að grund­völl­ur sé fyr­ir starf­semi hér.

Þarna mun slengt saman tveimur gerólíkum hópum, sá fyrrnefndi hefur verið sagður norræn nazista­samtök, komin með fámennt útibú hér, en sá síðarnefndi er sjálfsprottinn hér heima og hefur staðið fyrir upplýsingastarfi um ástand innflytjendamála í Norður-Evrópu og víðar, ekki sízt með því að fá hingað frægan fyrirlesara, Robert ..., á afar fjölmennan fund í Grand Hotel hér um árið (allt að fimm hundruð manns sóttu fyrirlestur hans og fróðleikskonu sem flutti þar einnig fyrirlestur), og eru meðal leiðandi manna í Vakri valinkunnur hæstaréttarlögmaður og þingmaður og annar kunnur að áfangasigri sínum í veiðileyfamálum fyrir smáútgerðarmenn á Patreksfirði.

Annaðhvort Vakur eða hópurinn Tjáningarfrelsið mun hafa staðið að því að fá hingað norska rithöfundinn Hege Storhaug, sem hefur vinstri sjónarmið og kvennabaráttu að bakgrunni sínum og var blaðamaður á Klassekampen, sem er eitthvað sem Eyrún, meintur haturs­sérfræðingur, ætti að kannast við. Það var ekki fyrr en pakistönsk kona, ofsótt af eiginmanni sínum, leitaði hjálpar hennar, sem Hege Storhaug fór að kynna sér af alvöru hið erfiða hlutskipti múslimakvenna í Skandinavíu, þar sem ýmsar þeirra yngri höfðu verið  "heiðursmyrtar" af feðrum sínum, bræðrum eða frændum, en eiginkonurnar kúgaðar eins og sú, sem hér var getið. Tókst Hege að bjarga henni undan karlinum norður í land, þar til hann komst á snoðir um íverustað hennar og myrti hana með köldu blóði! Eftir það hefur Hege lagt mikið á sig til að upplýsa um öll þessi mál í ræðu og riti, rætt mikið við múslimasamfélagið og farið ítrekað til Pakistans, jafnan í þágu kvenna.

Í þessari frásögn felst enginn rasismi, ekki frekar en í hinum frábærlega upplýsandi bókum Hege, sem hér á landi hafa komið út í þýðingu Magnúsar Þórs Hafsteinssonar, blaðamanns og rithöfundar, fyrrverandi þingmanns Frjálslynda flokksins. Þetta eru ritin Dýrmætast er frelsið -- innflytjendastefna og afleiðingar hennar (359 bls., Rvík 2008: Bókafélagið Ugla) og Þjóðaplágan íslam (424 bls., Rv. 2015, útg. Tjáningarfrelsið).

En þeir, sem vilja sjá aðfarir islamista, ættu að horfa á BBC-fréttaþáttinn Horfnu stúlkurnar í Nígeríu, sem var að hefjast í endursýningu Sjónvarpsins þetta miðviku­dagskvöld kl. 23.50. Fjallar hann um hryðju­verka­samtökin Boko Haram, mannrán þeirra (á a.m.k. 2.000 stúlkum árin 2014-15, ekki sízt kristnum), nauðganir og þvingun þeirra í hjónaband með múslimum og ótrúleg fjöldamorð á kristnum karlmönnum og drengjum. -- Ég hafði horft á fyrri sýningu þessa þáttar hér, en var aftur miður mín af sorg og samlíðan með þessum unglings­stúlkum og öðrum fórnarlömb­um (sem sumar stúlknanna voru jafnvel neyddar eða heilaþvegnar til að skera á háls) við að horfa á þetta aftur. En þetta er ein ljótasta birtingar­mynd herskárrar islams­trúar.

Jón Valur Jensson.