Enga skyndibyltingu stjórnarskrárinnar!

Hinar framhleypnu hugmyndir Sam­fylk­ing­ar­innar* og evró­kratans Þorvaldar Gylfa­sonar um uppstokkun stjórnar­skrár voru aldrei vilji meiri­hluta þjóðarinnar og einna sízt að þar yrði í senn gefið grænt ljós á snögga inntöku landsins í ESB og girt fyrir að þjóðin gæti krafizt þess að snúið yrði við frá því innlimunarferli. En út á það gekk einmitt hernaðar­áætlun ofangreindra.

* sjá http://fullveldi.blog.is/blog/fullveldi/entry/2202858/

JVJ

Fjarar undan tillögum um stjórnarskrá

Skrifstofan opin núna um helgina laugardag 23. og sunnudag 24. sept. kl. 14 – 16

Við verðum með opna skrifstofu núna um helgina laugardaginn 23. september og sunnudaginn 24. september frá kl. 14 til 16 báða dagana. Hvetjum alla stuðningsmenn til að nota tækifærið og koma á skrifstofu okkar og skrifa undir meðmæli með framboði okkar fyrir Alþingiskosningarnar og taka með sér meðmælalista og hjálpa okkur að safna meðmælum.

Við verðum með heitt á könnunni og með því.

Stjórnin.

Skrifstofa Íslensku þjóðfylkingarinnar er í Dalshrauni 5, Hafnarfirði, beint á móti Fjarðarkaupum (handan þjóðvegarins til Keflavíkur).

Fyrsta tilfelli hálf-brjálaðs islamista komið upp á Íslandi - verið hér undir fölsku nafni í tvö ár, ógnandi, í glæpum og hlynntur Ríki islams!

Undarleg er biðlund og þolinmæði lögregl­unnar og einkum Útlend­inga­stofnunar við þennan mann, sem á hér alls ekki heima og á sér engar máls­bætur. Ótrú­legur ferill hans er rakinn hér á Mbl.is (tengill neðar) og DV.is. Það er í meira lagi heppi­legt að þessi Marokkó­maður hefur engan mann drepið, eins og landar hans gerðu á Spáni og í Finnlandi nýlega.

Hér er upphaf DV-fréttarinnar:

Hælisleitandi á Íslandi gekk berserksgang nakinn og birti áróður fyrir íslamska ríkinu

Talinn brotamaður samkvæmt ógnarmati - Birti mynd á facebook tengda Ríki íslams og ritaði Ísland undir myndina

Ritstjórn DV [e-mail]

17:10 › 20. september 2017

Mynd: DV ehf / Sigtryggur Ari

Hæstiréttur hefur staðfest úrskurð héraðsdóms Reykjavíkur sem kveður á um að erlendur karlmaður, sem synjað var um hæli hér á landi skuli sæta gæsluvarðhaldi allt til mánudagsins 2.október. Lögregla telur manninn ógna almannahagsmunum en hann hefur ítrekað komist í kast við lögin undanfarnar vikur. Maðurinn villti á sér heimildir fyrir íslenskum yfir­völdum og er brotamaður samkvæmt ógnarmati RLS.

Manninum var synjað um vernd síðast með ákvörðun kæru­nefndar útlendinga­mála 26. janúar á þessu ári Unnið er að því að brottvísa manninum frá Íslandi og er embætti Ríkis­lögreglu­stjóra í því skyni í samskiptum við yfirvöld í móttöku­landinu.

Fram kemur í úrskurði héraðsdóms að maðurinn hafi sótt um hæli á Íslandi í september 2015. Gaf hann þá upp ákveðið nafn og sagðist vera frá Marokkó. Sagðist hann einnig hafa setið í fangelsi í Marokkó í fimm mánuði vegna þátttöku sinnar í andspyrnuhreyfingu.

Þá kemur fram að lögregla hafi ítrekað haft afskipti af manninum undanfarna mánuði, meðal annars vegna hótana, ógnandi og annarlegrar hegðunar hans, ofbeldis og fíkniefna­lagabrota. Í kjölfar þess hafi farið fram ógnarmat á mann­in­um hjá embætti Ríkislögreglu­stjóra þar sem meðal annars var óskað eftir upplýsingum frá erlendum löggæslu­stofnun­um um hann. Við gerð matsins kom í ljós að maðurinn hafði birt mynd á Facebooksíðu sinni 1. ágúst sl. tengda hryðju­verka­samtökunum Ríki íslams og ritað Ísland undir myndina.

Maðurinn leyndi eftirnafni sínu fyrir íslenskum yfir­völdum og villti þannig á sér heimildir. Gaf hann upp nokkur mismunandi nöfn og útgáfur af nafni sínu og annað fæðingarár, meðal annars í Noregi, Belgíu, Hollandi og Frakklandi. Samkvæmt upplýsingum frá alþjóðlegum löggæslu­stofnunum gerðist maðurinn sekur um þjófnaði í Noregi á árinu 2014, notaði fölsuð ferðaskilríki í Hollandi, braut útlendingalög í Frakklandi á árinu 2008 og þá er hann skráður í málaskrá lögreglu í Marokkó fyrir ofbeldi og hótanir í garð foreldra sinna árið 2012.

Niðurstaða ógnarmats RLS er sú að maðurinn sé brotamaður og fullt tilefni til að lögregla ynni í hans málum vegna ógnandi og undarlegs atferlis hans.

Mál sem eru til meðferðar og rannsóknar lögreglu undanfarna mánuði í tengslum við manninnn eru tíu talsins og eiga sér stað á tímabilinu 6.júlí til 2.september á þessu ári ...

----Rakið er þetta nánar á DV.is, látum fyrsta tilfellið nægja hér:

6. júlí sl. barst lögreglu tilkynning um að maðurinn hefði verið nakinn og blóðugur og gengið berserksgang. Braut hann topplúgu á bifreið og tók um andlit manns, reif af honum gleraugun og klíndi blóði í fötin hans. Sagðist hann hafa neytt lyfja og reykt maríjúana áður en þetta gerðist og því ekki getað ráðið við sig og ekki geta útskýrt hegðun sína....

----Að lokum: "Var það niðurstaða héraðsdóms að maðurinn skyldi sæta gæsluvarðhaldi til 2.október og hefur Hæstiréttur sem fyrr segir staðfest úrskurðinn." (DV.is)

Já, hingað koma ýmsir sem notfæra sér gestrisni okkar og mis­nota aðstöðu sína, með álagi á okkar allt of fámenna lögreglu­lið, að ógleymdum ríkis­sjóði og skatt­greið­endum, en nú er talið, að heildarkostnaður vegna hælisleitenda og flóttamanna á þessu ári einu saman sé ekki undir 14 milljörðum króna. En í boði veik­lyndra pólitískra flokka eins og "Viðreisnar" og "Bjartrar fram­tíð­ar", auk VG, Samfylk­ingar og Pírata, sem og jafnvel í boði Sjálfstæðis­flokksins, hefur þetta verið liðið og umborið og því jafnvel hossað í umræðum manna sem dæmi um mannúð og umburðarlyndi!

Ef þetta, þessi óumbeðni kostn­aður sam­félagsins, er þeirra mannúð og umburð­arlyndi, biðjum þá heldur um vægð stjórnvalda við fátæka Íslendinga, aldraða og öryrkja og jafnvel fárveikt fólk sem hírist í tjöldum og má senn búast við mun kaldari nóttum!

Eitt er víst: að Íslenska þjóðfylkingin tekur málstað Íslend­inga fyrst og fremst, ekki þeirra sem misnota sér græsku­lausa gestrisni okkar og ástæðu­lausa vorkunnsemi.

Jón Valur Jensson.

Ritaði Ísland undir mynd af Ríki íslams

Rúmlega tvöföldun hælisleitenda hingað fyrstu 8 mánuði þessa árs! - kostnaður á 2. tug milljarða

779 voru umsóknirnar 1/1-31/8, en 385 á sama tíma í fyrra. Fyrstu 18 daga í sept. eru þeir 59. Ákvörðun stjórnvalda að gefa tveimur albönskum stór­fjöl­skyldum íslenzk vega­bréf hleypti skriðu af stað, jafnvel Bjarni Ben. er farinn að viður­kenna það, en ber þó fulla ábyrgð á þessu. En hann fekk aldeilis að heyra það á fundi Sambands eldri sjálf­stæðis­manna daginn áður en ríkis­stjórnin sprakk, að flokkurinn hefði farið illa að ráði sínu: 

„Þór Whitehead, sagnfræð­ingur, steig fram og sagði að „hælisleitenda­straumurinn“ stafi að stórum hluta af ákvörðun fyrrverandi innanríkis­ráðherra Sjálfstæðis­flokksins um að afturkalla ákvörðun Útlendinga­stofn­unar um að neita fjölskyldu frá Albaníu landvist. Fiskisagan hafi flogið um að Íslendingar væru reiðubúnir að opna sitt land. „Í þessum löndum ríkir engin neyð. Þessi ákvörðun er ákvörðun Sjálfstæðis­flokksins. Hún hefur ýtt undir þennan straum sem er að kosta ríkisstjórnina sjö milljarða,“ sagði Þór* og bætti við að „því miður“ hafi í tíð Bjarna bæði Icesave-málið og ESB-málið skaðað Sjálfstæðisflokkinn. „Ég óttast að haldi flokkurinn áfram á þessari braut skaði hann þjóðina og sjálfan sig,“ bætti hann við. (Mbl.is, feitletrun JVJ.)

En þrátt fyrir að Sjálfstæðis­flokkurinn sé farinn að vakna til málsins og tveir ráðherrar hans, Bjarni og Sigríður Andersen, byrjuð að snúa við blaðinu, þá eru Útlendingalögin enn þau sömu og ekki aðeins það, heldur eru vinstri flokkarnir með "Viðreisn" nú farnir að stefna að enn frekari "líberalíseringu" á þeim lögum, eins og þau væru ekki nógu slæm fyrir! Ætla flokkarnir að bera fram frumvarp um það mál á þessum fáu dögum sem eru eftir til kosninga. Og einna harðasti maðurinn á þessu er Þorsteinn Víglundsson, velferðarráðherra Viðreisnar, eins og útgjalda­liðir hans ráðuneytis séu ekki ærnir fyrir! En strax daginn eftir að fréttir bárust af reglugerðar­breytingu Sigríðar Andersen dóms­málaráðherra, gekk Þorsteinn fram með þveröfuga tilkynningu um meiri smugur fyrir hælisleitendur til að geta verið hér von úr viti og um tilheyrandi fjáraustur í það!

Þetta kemur einnig í kjölfar þrýstings frá litlum, ekki alþjóðlegum hópi, sem kallast "UNICEF á Íslandi" og hljómar eins og útibú frá Sameinuðu þjóðunum, en í stjórn þar eru eintómir Íslendingar og undir formennsku ... gamla krata­þingmannsins Guðrúnar Ögmundsdóttur! Sú hin sama heldur hér einnig uppi markvissri öfgastefnu gegn ófæddum börnum, enda verið formaður útibús Inter­national Planned Parenthood á Íslandi, en það eru mestu fósturvígssamtök heims og fengu 100 milljónir dollara árlega frá Obama-stjórninni til þess, en Trump forseti var ekki seinn á sér að skrúfa fyrir þann fjáraustur. Nú keyrir Guðrún hins vegar á það, að hér verði frjálst hægt að drepa ófædd börn til loka 5. mánaðar meðgöngu og kallar það kven­réttindi! Merkilegt nokk gleypti allur Sjöflokkurinn jánkandi þá tillögu hennar, þegar málið var rætt á Alþingi 27. marz sl. EINI flokkurinn sem berst gegn þessu er Íslenska þjóðfylkingin.

En vinstri flokkarnir keyra á þetta hælisleit­endamál, ekki sízt "Björt fortíð" og "Viðreisn", og virðast halda að endalaust séu til peningar í þennan útgjaldalið, á sama tíma og öryrkjar og aldraðir eru vanræktir og gengið milli bols og höfuðs á sauðfjár­bændum og ofursköttum bætt við á landbyggðar­fólk í formi "kolvetna­gjalds"! Og það hentar að geta flaggað virðulega útlítandi nafni stofnunar eins og "UNICEF á Íslandi", sem er þó ekkert óskeikulli en gamla rauðsokkan (herskái femínistinn) sem þar trónir sem formaður! 

Á líka lund er stefna 365 miðla og Fréttablaðsins skv. leiðara Magnúsar Guðmundssonar ritstjórnarfulltrúa, sem sagði, að "kannski ætti það að vera reglan fremur en undantekningin" að "láta mannúðarástæður ráða för". En með því móti værum við ekki bara að bjóða hingað þúsundum og tugþúsundum manna, heldur margfalt fleira fólki.

Á sama tíma er fyrrverandi formaður bræðraflokks Samfylkingarmanna í Bretlandi, Tony Blair, að leggja til, í ljósi reynslunnar (sbr. hliðstæðar breytingar í Skandinavíu), að innflytjendalög þar verði þrengd. Íbúar Bretlands eru nú tæpar 65 milljónir. En vinstri flokkarnir íslenzku, Fréttablaðið og ugglaust fréttastofa Rúv vilja, að hér, í rúmlega 300.000 manna smáríki, "ráði mannúðar­ástæður för" í þessum málum, og því er lagt til að setja lög gegn ákvörðun Útlendingastofnunar og úrskurðarnefndar kærumála, úr því að Sigríður Andersen dómsmálaráðherra féllst ekki á að misbeita valdi sínu gegn löglegum ákvörðunum nefndra stofnana, sem falið var þetta vald.

Jafnvel ýmsir íslenzkir þingmenn, sem ættu að vita betur, keyra blint af augum á þetta mál, en ættu að spyrja sjálfa sig ærlegrar spurningar: Er eins og hálfs árs viðvera hér á landi og vinátta við nágranna/skóla- eða vinnufélaga nægileg til að gefa fjölskyldum viðvarandi búseturétt hér og í kjölfarið ríkisborgararétt? Er það það sem menn vilja segja: að við eigum að búa til undantekningar um öll slík tilfelli? Ekki hafði undirritaður og hans fjölskylda slíkan rétt á þeirra tæpu fjórum árum í Bretlandi. Vita menn um nokkurt land, sem býður öllum útlendingum slíkan rétt?

Svo var þetta ekki bara spurning um tvær stelpur, ekki um að aðskilja þær frá fjölskyldum sínum, og ekki um þau ein í tveimur fjölskyldum (alls 6 manns þar) skv. einhverri geðþótta-ákvörðun, heldur alla í sambærilegri stöðu. Og ekki eru stúlkurnar í neinni lífshættu, sem betur fer.

RÚV-FRÉTTIN:

"Á fyrstu átta mánuðum ársins hafa borist 779 umsóknir um alþjóðlega vernd hér á landi. Það eru tvisvar sinnum fleiri en bárust á sama tímabili í fyrra þegar umsóknirnar voru 385.

Á vef Útlendingastofnunar segir að fjölgunin á milli ára bendi til þess að umsóknir um alþjóðlega vernd verði fleiri á þessu ári en því síðasta. Umsóknir það sem af er september eru 57.

154 einstaklingar sóttu um alþjóðlega vernd á Íslandi í ágúst síðastliðnum. Það er töluverð aukning frá síðasta ári en í ágúst í fyrra voru umsóknirnar 67 talsins.

Rúmur helmingur þeirra einstaklinga sem sóttu um alþjóðlega vernd hér á landi í ágúst eru georgískir ríkisborgarar, að því er fram kemur á vef stofnunarinnar.

Umsækjendur í ágúst voru af 22 þjóðernum, flestir komu frá Georgíu, 89 talsins og 14 frá Albaníu. Fimm umsóknir bárust frá rússneskum ríkisborgurum. 85 prósent umsækjenda voru fullorðnir og 15 prósent yngri en 18 ára.  

Niðurstaða fékkst í 94 mál í ágúst. 20 umsóknir voru teknar til efnislegrar meðferðar og voru átta mál afgreidd í forgangsmeðferð. 7 mál voru afgreidd með ákvörðun um endursendingu á grundvelli Dyflinnarreglugerðarinnar. 67 umsækjendur drógu umsóknir sínar til baka.

13 þeirra 20 mála sem tekin voru til efnislegrar meðferðar lauk með ákvörðun um synjun og sjö með ákvörðun um veitingu verndar eða dvalarleyfis af mannúðarástæðum. Flestar veitingar voru til umsækjenda frá Írak, fimm talsins, en flestir þeirra sem var synjað eru frá Albaníu, 10 talsins." (Ruv.is)

 

* Heildareyðsluféð í hælisleitendur á þessu ári er þó í reynd miklu meira en sjö milljarðar, þegar allt er talið með, útgjöld a.m.k. þriggja ráðuneyta, Trygginga­stofnunar ríkisins, Sjúkra­trygginga Íslands og heils hers af lögfræð­ingum og öðrum þjónustu­aðilum.

Jón Valur Jensson.

UNICEF: Breyta þarf útlendingalögum

Óstjórn í innflytjenda- og hælisleitendamálum: Útlendingarlöggjöfin mistök sem þarf að afturkalla

Guðmundur Þorleifs­son, formaður Ís­lensku þjóð­fylk­ing­arinnar, er í ágætu viðtali á Mbl.is (tengill neðar). Enn öflugri og snarp­ari er þó grein hans á vef flokks­ins, x-e.is, með ofan­greindri fyrirsögn. Lesið hér á eftir! Meðmælin er auðvelt að veita. -JVJ.

Formaður Íslensku þjóðfylkingarinnar skrifar:

Það er augljóst að núverandi ríkisstjórn hefur enga stjórn á innflytjendamálum, hvort heldur eru hælis­leitendur eða flóttafólk.  Að ekki sé talað um óstjórnina á vinnumarkaðinum, þar sem talið er að veruleg vanhöld séu á eftirliti um þá er hér vinna og að þeir hafi tilskilin réttindi og njóti þeirra kjara sem samið hefur verið um að gildi á íslenskum vinnumarkaði.

Nýlegt dæmi er að vængbrotinn Sjálfstæðisflokkur, forystulaus með öllu, þó að í reynd séu þeir við stýrið á núverandi ríkisstjórn, þá hefur hann enga stjórn á þeim ráðherrum sem eru í Viðreisn og Bjartri framtíð.  Máttlausar eru tillögur dómsmála­ráðherra í að draga úr endalausum fjár­austri til afgreiðslu umsókna hælisleitenda. En velferðarráðherra Viðreisnar er snar í snúningum sem aldrei fyrr og boðar strax að hann komi til með að greiða fyrir þá sem Útlendinga­stofnun hafnar sem hælis­leitendum. Velferðar­ráðherra ætlar að greiða þeim eftir sem áður uppihald og aðlögunar­kostnað, þannig að tilhæfulausir hælis­leitendur, sem hefur verið hafnað, ná að nýta sér skattpen­inga hins almenna íslenska ríkisborgara.

Hvert erum við að stefna?

Íslenska þjóðfylkingin er eini stjórnmálaflokkurinn sem er með skýra stefnu í þessum málum og er ekki tilbúinn að hvika frá henni. Hún felur í sér að afnema núverandi útlendinga­lög, sett verði lög sem taka mið af fyrri lögum. Þá verði fyrirtæki sem flytja fólk til landsins gerð ábyrg fyrir þeim, þannig að komi slíkir farþegar skilríkja­lausir, verði þeim umsvifa­laust snúið strax við á ábyrgð þeirra sem fluttu þá til landsins. Þeim. sem hafa skilríki, en koma frá öruggum lönd­um, verði snúið við innan 48 tíma.  Þeir aðrir, sem talið er að eigi mögu­leika á að fá land­vistar­leyfi, fái víðhlítandi meðferð, enda geti þeir gert grein fyrir sér með skilríkjum og skal meðferð þeirra ekki taka meira en þrjá mánuði. Hvað varðar móttöku á flóttafólki sem ríkisstjórnin hefur ákveðið að taka á móti, samkvæmt samn­ingum við Sameinuðu þjóðirnar, skal að öllu jöfnu leitast við að taka einstak­linga sem eru með áþekkar lífsskoðanir og tíðkast hér á landi og eru tilbúnir að leggja það á sig að læra tungumál okkar og laga sig að íslenskri menningu og háttum.

Íslenska þjóðfylkingin varar við fólki sem er eins og þekktur Ragnar Reykás, blaðrar út og í, hvernig sem vindurinn blæs hverju sinni. Stjórnmálamenn þurfa að þora að hafa skoðanir, hafa pólitíska sýn, en hlaupa ekki undan í flæmingi, vegna þess að þeir þola ekki að vera kallaðir illum nöfnum (rasistar t.d.). Ef þeir eru trúir sjálfum sér falla slíkar upphrópanir af mönnum, því málstaðurinn hlýtur að þola gagnrýni.

Þegar menn skoða allt það fjármagn sem í þennan málaflokk fer og áætla má að verði nær 10 milljörðum á þessu ári, þá er núverandi ríkisstjórn tilbúin að fórna eigin fólki, t.d. sauðfjárbændum, smábátasjómönnum og fleirum sem myndu kosta lítið brot af þessari óráðsíu. Það er greinilegt að núverandi ríkisstjórn er fjandsamleg Íslendingum, en er tilbúin að brjóta niður íslenskt samfélag með það að markmiði að þvinga landið inn í ESB.

Íslenska þjóðfylkingin kemur ætíð til með að standa fyrst og fremst vörð um hagsmuni landsins og þeirra sem hér búa. Því miður hefur flest það, sem Íslenska þjóðfylkingin varaði við fyrir gildistöku núverandi útlendingalaga og ítrekaði í aðdraganda síðustu alþingiskosninga, komið fram. Því ættu landsmenn að leggja við hlustir og láta ekki slá ryki í augu sín. Flokkurinn mun standa vörð um ykkar hagsmuni hvar í sveit sem þið standið.

Guðmundur Þorleifsson.

„Okkur líst alltaf mjög vel á kosningar“

Brezkur almenningur vill fleiri vopnaða lögreglumenn á göturnar

Enn eitt hryðjuverk var framið í London í gær. 29 særðust, en hefðu flest­allir farizt, ef sprengjan hefði sprung­ið til fulls. Þó­nokkr­ar til­raunir til fleiri hryðju­verka hafa verið gerðar á ár­inu, en afstýrt af lögreglu, auk þeirra sem "heppn­uðust" að ósk öfga-islamista í Bretlandi, með 34 manna dauðsföllum. Almenn­ingur stendur með stjórn­völdum og vill að lögreglan í götu­eftirliti og við lestar­stöðvar og sérstakar fjölda­samkomur sé vopnuð. Ennfremur var virkjuð áætlun, Temperer, sem felur í sér þátttöku hermanna.

Meintur tilræðismaður, 18 ára karlmaður, hefur nú verið handtekinn. "Ríki islams" lýsti yfir ábyrgð á glæpnum. (Byggt á Rúv.is, Mbl.is, http://www.bbc.com/news/uk-41292528)

Jón Valur Jensson.

Maður handtekinn í tengslum við hryðjuverkin

Taktíkin að baki?

Var Brynjar Níelsson sendur út af fundinum í Valhöll til að þreifa mætti á því hvort hljómgrunnur væri fyrir sitjandi starfsstjórn áfram? Enginn hljómgrunnur reyndist fyrir því. Þá var kominn tími á yfirlýsingu Bjarna að stefnt væri á kosningar í nóvember.

JVJ

Yfirlýsing Bjarna í Valhöll

Sjálfstæðisflokkurinn hræðist kosningar!

Ráða má af uppl. Brynjars Níelssonar af þing­flokksfundi í Valhöll, að Sjálf­stæðis­flokk­urinn hræðist kosningar, vilji ekki uppgjör þjóðar­innar við það sem úr­skeið­is hefur farið, og má það heita skiljan­legt!

Brynjar sagði fundinn hafa verið góðan og "mikið kjaftað". Sjálfur "kjaftaði" hann of mikið í morgun­útvarpi Rúv, eins og menn heyrðu í hádegis­fréttunum, því að allt of frakkur var hann og stærilátur og ekki næmari en Benedikt Sveinsson fyrir því, hvað hyggilegt er að gera og segja. En nýskroppinn út af fundinum sagði Brynjar:

„Við erum að fara yfir ástandið og mögu­leik­ana og hvað hægt er að gera. Mér finnst að for­sæt­is­ráðherra eigi að reyna að mynda starf­hæfa rík­is­stjórn. Það er auðvitað lyk­il­atriði og ég held að þjóðin eigi það skilið,“ seg­ir Brynj­ar. 

Brynj­ar seg­ir sam­stöðu vera meðal þing­manna Sjálf­stæðis­flokks­ins að mynda nýja starf­hæfa rík­is­stjórn, frek­ar en að ganga til kosn­inga. (Mbl.is, leturbr. hér.)

Þarna sjá menn þankaganginn, það stendur ekki til að bera málin undir þjóðina!

En sjálfum tókst Bjarna Benediktssyni á sínum lokadegi sem forsætisráðherra að afhjúpa þá staðreynd, að stefna flokksins í innflytjendamálum hafi verið ófarsæl og til bölvunar, ef eitthvað er! (sjá um það næstu grein hér á undan).

Jón Valur Jensson.

Lykilatriði að mynda starfhæfa stjórn

Mismunun augljós í hælisleitendamáli. Og hingað er boðið flóði af kvótaflóttamönnum, þvert gegn 0-stefnu Dana!

Vilja menn lög í þágu fáeinna einstaklinga sem eru í engu verri aðstöðu en tugir annarra sem ekki er sinnt? 

Áætlun Dana var: 500 kvótaflóttamenn á ári; jafngildir 30 hér, en 100 er ósk Engeyjarfrænda!

En algert HLÉ á móttöku kvótaflóttafólks ákváðu Danir jafnvel í fyrra! Stefnan hafði verið 1500 á þriggja ára tímabili, en verður 0 manns nákvæmlega, því að þeir vita sem er, að aðlögun þeirra, sem komnir eru, hefur verið ófullnægjandi, og ætla sér ekki að sitja uppi með illa orienterað lið í landinu.

Kvóti Engeyjarfrænda af samkynhneigðum karlmönnum frá Kenýa, þar sem þeir eru ekki ofsóttir, en þó taldir kvótaflóttamenn, verður tíu manns á næsta ári. Danir eru 16,5 sinnum fleiri (5,6 milljónir) en landsmenn hér (340þ). Ef þeir tækju hlutfallslega við jafnmörgum og Íslendingum er ætlað, væri skammtur þeirra af samkynhneigðum karlmönnum 165 á næsta ári, en verður: ENGINN. 

Hér ætla svo Engeyjarfrændur að fá 100 kvótaflóttamenn árið 2018, þótt ekkert stríð geisi í Evrópu, Norður-Afríku né Mið-Austurlöndum lengur. Ef Danir tækju þá hlutfallslega við jafnmörgum kvótaflóttamönnum, yrðu þeir 1650 talsins á því ári. En í reynd verða þeir ENGIR! (Heimild: Fréttablaðið í dag, smáfrétt á bls.6.)

Engeyjarfrændur vilja greinilega vera miklir menn í augum "Góða, göfuga, gáfaða fólksins", þess hins sama sem gekk hart fram með kröfur sínar á síðasta kosningaári og kvaðst sjálft ætla að taka við flóttamönnum og hælis­leitendum í sín hús, en gleymdi svo að efna loforðið! Er þetta fólkið (með sínum Illuga Jökulssyni) sem á að móta hér stefnu í málum? Á ekki frekar að fara eftir reynslunni, eins og Danir og Norðmenn gera nú?

Jafnvel Bjarni Benediktsson er byrjaður að átta sig á því, að það er ekki eðlilegt, að lögreglan geti ekki haft tal af hælisleitendum á Kjalarnesi nema undir vopnum! (sjá nýja grein Björns frænda hans Bjarnasonar: Söguleg ummæli forsætisráðherra um útlendingamál).

Svo voru sumir að halda því fram, að Íslenska þjóðfylkingin færi með fleipur!

Jón Valur Jensson.

Frumvarp um Mary og Hanyie lagt fram

Kaffispjall á skrifstofu Íslensku þjóðfylkingarinnar fimmtudaginn 14. september

Fimmtudaginn 14. september verður Helgi Helgason með kaffispjall á skrifstofu Íslensku þjóðfylkingarinnar að Dalshrauni 5 í Hafnarfirði frá kl. 16 til 18.

Húsnæðismál, fátækt og málefni hælisleitenda hafa verið í brennidepli undanfarið. Eru kosningar framundan?

Stjórnin.