Bloggfærslur mánaðarins, ágúst 2017

Er jafnvel Merkel farin að átta sig á mistökum sínum?

Það er undarlega öfugsnúið að segjast vera of­sóttur eða búa við óbæri­legt stríðs­ástand í ættar­landi sínu, sækja því um og fá hæli hjá þýzkum eða sænskum góð­menn­um, en kjósa svo helzt að fara í sumar­frí til gamla, vonda landsins!

Angela Merkel, kanslari Þýskalands.

Angela Merkel er alveg hissa á þessu, en við umhugsun áttar hún sig á því, að "það gangi ekki upp að fara í leyfi til landsins þar sem viðkomandi segðist vera ofsóttur. Það gæti orðið til þess að hæl­is­um­sókn­in yrði end­ur­skoðuð" (Mbl.is).

Þó það nú væri! En hugsanlega eru þessir hælis­leitendur ekki allir að spóka sig í fríinu, heldur sumir hverjir að hitta gamla baráttu­félaga og fá jafnvel hjá þeim leiðsögn og fyrirskipanir um baráttuna í nýja landinu. Það sama gerðu nokkrir helztu íslenzku kommúnistarnir, að sækja sér línuna til Moskvu, og hví skyldu fylgismenn hryðjuverkasamtaka ekki gera það sama? Gæfumunurinn á þessu tvennu er þó sá, að barátta kommúnistanna hér á landi var ekki komin á sama ofbeldisstig og hjá ISIS-samtökunum sem hreykja sér af því þegar þau valda sem mannskæðustum hryðjuverkaárásum.

En prestsdóttirin úr Austur-Þýzkalandi er kannski byrjuð að skilja það í smá­skömmtum, þrátt fyrir önnur og stærilátari orð hennar í fyrradag, að iðulega hefði hún mátt hugsa sig tvisvar um, áður en hún tók stórtækar ákvarðanir um að opna land sitt fyrir milljón flóttamönnum nánast á einu bretti. En það er einnig í fréttum, að tugir þúsunda Sýrlendinga eru nú á heimleið, einkum frá Tyrk­landi, en "yfir 40 þúsund Sýr­lend­ing­ar hafa farið yfir landa­mær­in síðan það varð leyfi­legt 15. ág­úst, en um fjög­ur þúsund fara þangað yfir á hverj­um degi."

Og þá er spurning hvað gerist í Þýzkalandi. Þar fara fram þingkosningar á næstunni og búizt við að rótttæku samtökin AfD auki þá fylgi sitt. Allt getur hins vegar gerzt með Kristilega demókrata, sem voru í lægð um áramótin í skoð­ana­könn­unum, en hafa nokkuð bætt við fylgi síðan, en greinilega hefur Merkel talað út og suður um málin síðan og er kannski fyrst og fremst að hugsa um að halda sjálfri sér og flokkn­um á floti, en það er mikil og vanþakklát púlsvinna.

Jón Valur Jensson.


mbl.is Fari ekki í frí til heimalandsins
Tilkynna um óviðeigandi tengingu við frétt

Sjálfstæðisflokkurinn er ókristinn flokkur, það er málið

Styrmir Gunnarsson spyr, hissa á veruleikanum: Hvers vegna í Þýzka­landi en ekki á Íslandi? og á við: Hvernig ná Kristilegir demókratar í Þýzka­landi 38% fylgi, en Sjálfstæðisflokkurinn ekki 25%?

Svör:

  1. Að kjósa kristinn flokk er ekki að kjósa heiðinn efnis­hyggju­flokk. Sjálf­stæðis­flokkurinn hefur svikið eina upprunalega stoð sinnar hugmynda­fræði, þ.e. kristna manngildis­hugsjón og virðingu við kristin gildi, þar á meðal lífsgildið.
  2. Sjálfstæðisflokkurinn er orðinn róttækur nýfrjálshyggjuflokkur og röskur í sinni einkavina­væðingu, í stað þess að eiga sér styrka stoð í sinni gömlu varðveizlu­hyggju (conservatism), sem fylgdi honum frá stofnun hans með sameiningu Íhaldsflokksins og Frjálslynda flokksins um 1929.
  3. Sjálfstæðisflokkurinn er ekki lengur flokkur allra stétta, heldur auðmagns og fjármálaafla öðru fremur og nýtur þaðan styrkja í flokkssjóði sína.
  4. Sjálfstæðisflokkurinn hefur svikið öryrkja og aldraða um lofaðar kjarabætur.
  5. Sjálfstæðisflokkurinn tekur ekki skýra afstöðu með kristnum Vestur­löndum, heldur er opinn í báða enda gagnvart því að fá hingað flóðbylgju mikið til múslimskra innflytjenda; þetta virtist a.m.k. blasa við af mjög virkri þátttöku hans í að semja og samþykkja nýju Útlendinga­lögin á Alþingi 2016, enda þótt einn ráðherra, Sigríður Andersen, sýni nú andóf gegn þessari stefnu.
  6. Í skólamálum hefur Sjálfstæðis­flokkurinn hvað eftir annað sýnt, að hann lúffar fyrir þrýstingi vinstri manna og andkristinna um vaxandi áhrif þeirra í skóla­kerfinu, þar sem m.a. er reynt að hreinsa út kristin áhrif og setja heiðin inn í staðinn.

Sjálfstæðisflokkurinn nær ekki alhliða stuðningi stórs hluta almenn­ings með þessu móti, það ætti Styrmir að skilja, hann sem sjálfur skrifaði ágæt Reykja­víkur­bréf í Moggann um kristna arfleifð þessa flokks síns fram yfir miðja 20. öld. Að hann nær ekki nema 24,5% fylgi í nýjustu MMR-könnun, ætti því ekki að koma Styrmi á óvart, jafnvel þótt þetta gerist í kjölfar þess, að vinstri flokk­arnir hafa beðið skipbrot í kosningum vegna vondra verka sinna.

En Sjálfstæðis­flokkurinn er ekki einn um svik við kristnar manngildishugsjónir. Hver á fætur öðrum hafa pólitísku flokkarnir ýmist hætt yfirlýstum stuðningi við kristin gildi eða að stofnaðir hafa verið nýir án þess að minnzt sé á slík gildi.

Íslenska þjóðfylkingin er nú einn flokka með skýrar kristnar áherzlur. "Íslenska þjóðfylkingin styður kristin gildi og viðhorf. ÍÞ virðir trúfrelsi, en hafnar trúarbrögðum sem eru andstæð stjórnarskrá. ÍÞ hafnar því að moskur verði reistar á Íslandi. Búrkur verði bannaðar og umskurður stúlkna af trúarlegum ástæðum. ÍÞ hafnar skólahaldi islamista á Íslandi. ÍÞ vill styðja þá innflytjendur sem aðlagast íslensku samfélagi." (Úr stefnuskrá flokksins.)

Ennfremur er þetta yfirlýst stefna flokksins, í þessari samþykkt landsfundarins í vor: "Ófædd börn eiga rétt til lífsins. Flokkurinn tekur einarða afstöðu gegn nýfram­komnum hugmyndum um róttækar breyt­ingar á fóstur­eyð­inga­löggjöfinni og mun taka á þessum málum með það að markmiði að draga sem mest úr fóstur­eyðingum." Með þessu er Þjóðfylkingin eini flokk­urinn með slíka lífs­verndar­hugsjón, andstætt Sjöflokknum á Alþingi, sem 27. marz sl. sýndi blygðunar­lausa meðvirkni með fráleitum tillögum um að gera fóstur­eyðingar algerlega frjálsar og allt til loka 22. viku meðgöngu! EINI and­stæði flokk­urinn er Íslenska þjóðfylkingin.

Já, andstætt Sjálfstæðisflokknum þorum við að hafa þessa stefnu til varnar kristnum og þjóðlegum arfi okkar, án þess að setja okkur á neinn hátt yfir aðrar þjóðir. En við viljum standa vörð um ófædd börn, sem eru framtíð þjóðarinnar, og um landa­mæri þjóð­ríkisins, andstætt stefnu "No Borders"-öfga­hópsins, sem hefur notið of mikillar undan­látssemi yfirvalda hér og jafnvel átt vísan beinan stuðning svokallaðs "útvarps allra landsmanna"!

Jón Valur Jensson.


Fækkum hraðabungum í höfuðborginni!

Það er löngu kominn tími til að skafa burt stóran hluta af óþörf­um hraða­bung­um í Reykja­vík. Víða duga aðrar umferðar­merkingar, en bæði bílar og menn verða leik­soppar harðra ákeyrslna á hraða­bungur, m.a. í snjókomu, dimmu eða litlu skyggni.

Menn finna það á sjálfum sér, ekki sízt í strætis­vögnum, hve óþægi­legur þessi hoss­ingur er fyrir lík­am­ann, og hefur þeim tilfellum fjölgað með fjölgun erlendra bílstjóra strætis­vagna­fyrir­tækjanna, manna sem trúlega hafa ýmist litla aksturs­reynslu eða öku­próf sem jafnast ekki að gæðum við það sem íslenzkir bílstjórar hafa.

Ennfremur hefur orðið tjón á bílum við að þeir skullu á hraða­bungum.

Þess vegna hittist skemmtilega á, að það er einmitt framkvæmda­stjóri borg­ar­fyrirtækis í slíkum vagnaferðum, Jóhannes Rúnarsson, frkvstj. Strætós bs., sem vekur athygli á þeim baga sem þessar bungur eru fyrir strætis­vagnana, jafnvel þannig, að þær "tefja rafvæðingu strætis­vagna­flotans á höfuð­borgar­svæðinu, og hefur afhending fjögurra rafvagna dregist um nokkra mánuði vegna þessa," eins og hann segir í fréttar­viðtali við Mbl.is.

Já, nú mega Hjóla-Hjálmar og Dagur borgar­stjóri á útleið sannar­lega fara að endurskoða sína umferðar-pólitík, sem í þessu efni sem öðrum er á ská og skjön við eðlilega skynsemi og iðulega í beinni mótsögn við vilja borgarbúa.

Tekið skal fram, að vitaskuld þarf að gera undantekningar um hraðabungur á götum þar sem reynslan sýnir að vegfarendum getur stafað hætta af hrað­akstri. En almennt myndi draga úr honum með notkun eftirlits­myndavéla.

Jón Valur Jensson.


mbl.is Hraðahindranir tefja rafvæðingu Strætó
Tilkynna um óviðeigandi tengingu við frétt

Viljum við svona sýndarmennsku-stjórnmálamenn?

Frönsku forsetarnir Macron, Hollande og Sarkosy eiga það sameiginlegt að hafa sólundað af ríkisfé í það að láta sminka sig og farða! Rakari Hollandes fekk 12,6 millj.kr. árlega úr ríkissjóði. Kona hans var á háum ríkis­laun­um, Macron vildi einnig ráða sína í forseta­höll­ina. Hann er fyrir vikið hrap­aður niður í það að vera óvin­sælli en Trump Bandaríkja­forseti, sá sem manna mest er rægður nú um stundir í frétta­stofum heims.

Sar­kozy eyddi 8.000 evrum, einni millj­ón króna, á mánuði í förðun þegar hann gegndi embætti for­seta! Þvílík pjattrófa!

Um þetta hafði verið fjallað í Vanity Fair, og er það einmitt við hæfi!

En hreykjumst ekki upp gagnvart Frökkum; gætum fremur að okkar eigin yfir­stétt, eins og seðla­banka­stjóranum og ýmsum ráðherrum sem þiggja óverð­skulduð laun og fríðindi á kostnað skatt­greið­enda. Það sama á við um borgar­fulltrúa og vara­borgar­fulltrúa, þrátt fyrir takmörkuð fundahöld og vinnu. Þetta þarf allt að endurskoða, þegar þar að kemur.

Jón Valur Jensson.


mbl.is Háar fjárhæðir í förðun forsetans
Tilkynna um óviðeigandi tengingu við frétt

Fylgið hrynur af ríkisstjórninni - Flokkur fólksins, ÍÞ og Dögun með 9,7%

Íslenska þjóðfylkingin er komin upp í 1,6% í nýrri MMR-könn­un, sannar­lega í rétta átt!

Og ríkis­stjórnin er ein­dregið farin að stefna á HRAP: Sjálf­stæð­is­flokkur tapar 5% af sínu þjóðar­fylgi, Björt framtíð fellur út af þingi (3,6%), ríkis­stjórnin sjálf hrapar úr 34,1% niður í 27,2%!

Þótt flokkur ESB-Benedikts virðist eiga sér "við­reisnar von" með 6,0% "nú", þá er það samt ekki NÚ, heldur var könn­unin gerð 15. til 18. þessa mán­aðar, þá var hneykslið um ólög­mætar styrk­upphæðir til Viðreisnar (einkum frá auðkýf­ingum) á kosninga­árinu enn ekki komið í ljós; en þetta svindl gaf þeim flokki yfirburði í kosningaauglýsingum, þess nýtur hann nú í þing­manna­fjölda, ráð­herra­launum og pólitísku valdi, sem vekur þó sára­litla hrifningu kjósenda eftir á, enda nær Viðreisn ekki fylgi Flokks fólksins, sem er komið upp í 6,7%.

Já, ríkisstjórn á útleið, skyldi maður vona, enda fáir spenntir fyrir henni, rétt rúmlega fjórði hver maður!!

Sjá frétt og línurit um úrslitin hér á vefsíðu MMR!

Jón Valur Jensson.


mbl.is Ríkisstjórnin með 27,2% fylgi
Tilkynna um óviðeigandi tengingu við frétt

Svíar viðurkenna staðreyndir, auka fé til lögreglu af brýnni nauðsyn vegna óaldar

Þeir ætla að auka framlög til lögreglu um tvo milljarða SEK (26,5 ma.ísl.kr.), í 7,1 ma.SEK og hefur aldrei verið meira.

Þetta kom fram á blaðamanna­fundi sem Stef­an Löf­ven, for­sæt­is­ráðherra Svíþjóðar, og Morg­an Johans­son, dóms­málaráðherra lands­ins, héldu í Eskilstuna í dag. Þar sagði Löf­ven að um væri að ræða viðleitni til að auka ör­yggi vegna ný­legra skotárása víða um landið.

„Þetta skap­ar hræðilegt óör­yggi fyr­ir fólk í þess­um íbúðar­hverf­um. Það er ekki ásætt­an­legt, við verðum að tak­ast á við vand­ann rétt,“ sagði for­sæt­is­ráðherr­ann. Bætti hann við að marg­ar saka­mál­a­rann­sókn­ir væru felld­ar niður og á sum­um stöðum furðaði fólk sig á því ef lög­regl­an kæmi yfir höfuð ef það hringdi. (Mbl.is)

Laun lögreglumanna verða líka hækkuð.

Þetta lýsir vandanum vel og ekki síður hitt, að níu manns voru skotn­ir í Svíþjóð um helg­ina, þar af þrír sem lét­ust. Gústaf Adolf Skúlason, sem er búsettur í námunda við Stokkhólm, hefur verið að lýsa þessum hlutum í pistlum sínum hér og snemma morguns í byrjun hverrar viku á Útvarpi Sögu, en hefur að ósekju mætt nokkurri tortryggni.

Það má segja, að uppivöðslusemi glæpagengja sé lögreglunni sænsku ágætis tækifæri til að beita sér líka gegn hættulegri árásargirni múslima í landinu. Þetta hefur "Góða fólkið" enn síður viljað viðurkenna, en við getum aðeins óskað Svíunum góðs árangurs við að koma böndum á ólöglegt athæfi meðal hinna fjölmennu múslima í landinu (fjölda þeirra er erfitt að meta, er þó a.m.k. þriðjungur milljónar, eins og allir sem búsettir eru á Íslandi).

Þó er spurning hvort vandinn sé í raun orðinn óviðáðanlegur.

Lengi hefur verið ljóst, að framlög til löggæzlu á Íslandi hafa verið allt of lítil, og er það vansi bæði fyrrverandi og núver­andi stjórnvalda, þvert gegn t.d. stefnu Íslensku þjóðfylkingarinnar. En skyldi stefnubreyting jafnvel sænskra krata ná að hreyfa við okkar stöðu spýtukörlum í röðum ráðherra?

Jón Valur Jensson.


mbl.is Hækka framlög til lögreglu
Tilkynna um óviðeigandi tengingu við frétt

Hryðjuverk Marokkómanna einnig á Norðurlöndunum - viðbúnaður enn ekki nægur

14 eru látnir eftir árás­ina í Barce­lona, 15 í lífs­hættu og 45 aðrir enn á sjúkra­húsi. Í Turku, Finn­landi, reynd­ist hnífa­árásar­maður frá Mar­okkó, drap tvo og særði átta í gær. Morð­ingj­arnir í Barcelona voru frá Marokkó. 

Finnska lög­regl­an seg­ir að um hryðju­verka­árás hafi verið að ræða er mað­ur­inn, sem er átján ára, hóf að stinga veg­far­end­ur á markaðstorgi borg­ar­inn­ar. Hún seg­ir að vís­bend­ing­ar séu um að árás­in hafi verið skipu­lögð. Fimm voru hand­tekn­ir í íbúð í Tur­ku í nótt, grunaðir um að tengj­ast mál­inu. Þeir eru einnig mar­okkósk­ir rík­is­borg­ar­ar. Þá hef­ur lög­regl­an lagt hald á bíl og lýst eft­ir manni sem sagður er hættu­leg­ur en haldi ekki til í Finn­landi í augna­blik­inu. (Mbl.is)

Finnska lög­regl­an telur að árás­inni hafi verið beint gegn kon­um:

„Við höld­um að árás­armaður­inn hafi ráðist sér­stak­lega gegn kon­um og að menn­irn­ir sem særðust hafi verið að koma þeim til varn­ar,“ sagði aðstoð­ar­yf­ir­lög­regluþjónn­inn Christa Cr­an­roth á fund­in­um. Yngsta fórn­ar­lambið var fimmtán ára og það elsta 67. Fórn­ar­lömb­in eru af ýms­um þjóðern­um, m.a. finnsk, bresk, ít­ölsk og sænsk. (Mbl.is)

Það er undarlegt að hlusta á valda spekinga Steypustöðvar Rúv í Vikulokum Helga Seljan, rétt eins og umræðuna víðar: að þetta sé t.d. tengt sjálfsvígs­áráttu margra ungra karl­manna, að rótina sé gjarnan að finna hjá okkur sjálfum og að lausnin við þessu fári (sem þó sé ekki eins alvarlegt og umferðarslys) sé gjarnan fólgin í því að halda áfram í góðri samstöðu eins og ekkert hafi gerzt: bezt að sýna, að þetta bíti ekki á okkur: að við gefumst ekki upp! 

Alveg er ljóst, að unnt er að koma í veg fyrir hryðjuverk með eftirliti og for­varnaraðgerðum. M.a. var vel hægt að setja upp umferðartálmanir á Römbl­una, göngu­götuna í Barcelona, þar sem sendi­bíllinn komst ½ km vegalengd, drepa­ndi og særandi á annað hundrað manns! En yfirvöld Barce­lona létu sér morð­árásir öfga­múslima í Nice og Lund­únum ekki að kenningu verða! Voru þau að horfa í kostnaðinn?! Eða varðveita frelsið?!

Gott eftirlit spænsku lögreglunnar tryggði að unnt var að beita sér af hörku gegn fimm manna hryðju­verka­hópnum í hinni árásinni, nálægt Barce­lona.

Hitt voru alger mistök leyniþjónustu og lögreglu að láta m.a. þann, sem fyrst var grunaður um að aka sendibílnum á Römblunni, ganga lausan, því að hann hafði lýst yfir þeirri eindregn­ustu ósk sinni að fá að drepa "trúleysingja" (og átti þar ekki sízt við kristna). Sérhvern, sem spýr úr sér þvílíku hatri, á að loka á bak við lás og slá og gjarnan í upprunalandi þeirra, það verður hæfileg refsing (samningar um slíkt eru mikil­vægir; við munum hafa gert slíkan samning a.m.k. við Litháen, í viðleitni gegn glæpa­gengjum þaðan).

Þá er það partur af eðlilegum forvarnar­aðgerðum að hafa strangt eftirlit með því, hvað fram fer í moskum og trúarskólum múslima, því að þar hefur hatrinu á Vesturlandamönnum verið dreift ótæpilega.

Sömuleiðis er afar mikilvægt að fara eftir þeim vilja 73% aðspurðra Evrópu­manna, að STÖÐVA beri inn­flutning fleiri múslima til álfunnar. Enginn flokkur hér á landi þorir að taka á þessu vandamáli annar en Íslenska þjóðfylkingin.

Í apríl drap múslimskur maður frá Úzbekistan fjóra í Stokkhólmi og gumaði eftir á af verki sínu: "Ég keyrði á hina trúlausu," sagði hann á vef Aftonbladet. Höfum hér líka í huga, að öfga­full­ir islam­ist­ar í Svíþjóð hafa nær tí­faldazt í fjölda á sjö árum! 16. júní sl. upplýsti yfirmaður sænsku öryggis­lög­reglunnar (Säpo) að ÞÚSUNDIR róttækra islamista séu nú í Svíþjóð. Og þessir menn hafa auðvelt ferðafrelsi til Íslands!

Til hvers erum við að bjóða þjóðum okkar upp á nærvist slíkra manna? Hér dugir ekkert minna en harka, öll linkind í þessum málum getur aðeins vegið að okkar eigin öryggi og lífum saklausra borgara. Og þessi er staðreynd málsins: Evrópuþjóðir sem loka nánast á aðkomu múslima (s.s. Pólverjar, Slóvakar og Ungverjar) sleppa alveg við hryðjuverk - hinar miklu síður.

Jafnvel hér á landi metur grein­ing­ar­deild rík­is­lög­reglu­stjóra hættuna vegna mögu­legra hryðju­verka "í meðallagi"! Því eru t.d. öryggisráðstafanir í dag, á Menningarnótt, sjálfsagðar.

En þessi er stefna Íslensku þjóðfylkingarinnar: ÍÞ vill herta innflytjenda­löggjöf og innleiða 48 tíma regluna í málefnum hælisleitenda. Það er ekkert vit í öðru en að setja þá fjármuni, sem til þarf, í lausn þessa vandamáls.

Jón Valur Jensson.


mbl.is Árásinni beint gegn konum
Tilkynna um óviðeigandi tengingu við frétt

Sigríður Á. Andersen talar skýrt og tæpitungulaust um mál hælisleitenda í afar upplýsandi viðtali

Sigríður dómsmála­ráðherra var gestur Arn­þrúð­ar Karls­dóttur í Útvarpi Sögu í gær og mælt­ist þar mjög sköru­lega um ýmis mál, ekki sízt um hæl­is­leit­end­ur eða með­ferð um­sókna þeirra, en einn­ig um s.k. hat­ur­sorð­ræðu (og m.a. spurð út í ójafn­ræði í þeim málum), um fíkni­efnamál og um upp­reisn æru.
 
Nú er markvisst unnið að því að stytta máls­meðferðar­tíma hælis­leitenda, nú þegar er (að hennar sögn) hafin vinna til þess að ná því mark­miði, með því að ráða fleira starfs­fólk og greina hraðar hvers eðlis þær umsóknir sem berist séu.
 
Hún segir að sérstaklega þurfi að hraða máls­meðferð tilhæfu­lausra umsókna, en Sigríður segir þó, að þegar afgreiðslu umsókn­anna sé lokið sé ekki búið að klára málin; “svo þarf að koma fólkinu úr landinu og það getur tekið dágóða stund, einkum og sér í lagi ef fólk er ekki með skilríki, þá hafa þessi eigin lönd jafnvel neitað að taka við þessu fólki," segir Sigríður. (Af vef Útvarps Sögu.)
 
Undir lok þáttarins kom fram, að Sigríður nýtur stuðnings ríkisstjórnarinnar við styttingu málsmeðferðar hælisleitenda og jafnframt við tillögu hennar um að fella niður lagaákvæði um uppreisn æru.
 
 
Viðtalið við Sigríði er reyndar efni tveggja fréttagreina á vef Útvarps Sögu á þessum nýliðna þriðjudagi, og þar er einnig að finna tónlistarspilara þar sem menn geta hlustað á viðtalið allt.
Í síðarnefndu fréttinni kemur fram, að vitaskuld tekur Sigríður ekki í mál, að hér fengju menn að komast upp með barnabrúðkaup (eins og tíðkast meðal ýmissa þjóða, þ.á m. sumra múslimskra).
 
Því ber að fagna, að dómsmálaráðherra er með skýra og góða stefnu í þessum málum sem snúa að útlendingum, en þar á meðal eru mörg atriði sem ekki var drepið á hér ofar. Sem flestir ættu að hlusta á þáttinn sjálfan, einkum fyrri hlutann og bláendann.

Jón Valur Jensson.


Vilja menn að þetta gerist hér líka - niðurbrot landsmálsins o.fl. óæskilegt?

Gömul yfirþjóð, með sitt málsvæði víðar en í Þýzka­landi, kemst nú að raun um, að hratt inn­streymi flótta­manna & hælis­leitenda stuðlar að því að þýzka víki fyrir ensku í vax­andi mæli, í stað þess að allir læri tungu landsins. Á veit­inga­stöðum í sjálfri höfuðborginni Berlín er ekki hægt að treysta því lengur að starfsfólkið tali þýzku - enskan er það algengasta! Á þetta hafa bæði ferðamenn og fyrrnefndir hópar sín áhrif.

En þannig er þetta einnig að verða á sumum veitingastöðum okkar í Reykjavík, og er það fremur óþægileg upplifun fyrir landann. Menn geta vitaskuld hent gaman að þessu og sagt að þetta sé gott á okkar þjóðrembu, en reyndar tölum við ekki íslenzku af neinum þjóðrembuástæðum, hún er bara það sem er okkur eðlilegt og jafnframt, í allri hógværð, verðmætt sem tæki okkar í tilverunni til samskipta og til að miðla góðum hugmyndum og arfi og njóta þess sem við höfum lært af öðrum og af verðmætum bókmenntum landsins.

Við Íslendingar erum á okkar hátt með enn viðkvæmara tungumál en stórþjóðin vegna smæðar okkar, og því gæti þetta, sem er að gerast í Berlín, dunið yfir okkur á skemmri tíma en okkur órar fyrir, en vonandi varðveitist þjóðtungan hér um aldir og helzt árþúsund. Það er ekkert unnið við það að enskan, sem gjarnan er flatneskjuleg í munni flestra hér, taki yfir, og það mun ekki auka vegsemd okkar hér í heimi á nokkurn hátt.

Frá Þjóðverjum getum við lært þá lexíu, að mjög hratt innstreymi nýbúa getur valdið röskun í menningu og samskiptum fólks ekkert síður en félagslegum breytingum, lækkandi launum, röskun á leigu- og húsnæðismarkaði ásamt jafnvel ótraustari stöðu kvenna og áhrifum á glæpatíðni. Því verður ekki of varlega farið í þessum efnum og brýn nauðsyn, að nægilegt fé fari til þessara mála til að aðlögun hinna aðkomnu að máli okkar og samfélagi geti á örfáum árum tekizt með viðunandi hætti.

Hitt er svo allt annar handleggur, að stöðva þarf hælisleitenda­strauminn með skjótum hætti og snaggaralegum, eins og Sigríður Andersen hyggst gera. Eftir að það hefur tekizt, vinnst okkur þetta allt miklu léttar, og við verðum líka betur í stakk búin til að taka við raunverulegum flóttamönnum, eftir efnum og aðstæðum. Vegna þess að kristni er nú ofsótt í mörgum löndum heims langt umfram það sem þekktist fram yfir síðustu aldamót, ættum við þar að beina sjónum okkar helzt að kristnum bræðrum okkar og systrum, bæði frá Afríku og Asíu og jafnvel landi eins og Venezúela, þar sem frjálshugsandi fólk er farið að flýja öfgafulla sósíalistastjórn einu sinni enn.

Jón Valur Jensson.


mbl.is Brjálaður vegna skorts á þýsku
Tilkynna um óviðeigandi tengingu við frétt

Þingmanna-þversagnir - krabbameins-göngudeild lokað því að 3 millj.kr. vantar; svo kasta þingmenn 5500 milljónum út um gluggann!

Kolbeini Proppé virðist þykja í lagi að ríkið borgi 20 milljóna gjald­þrot fyrir hann,* en að sumir Íslend­ingar verði að búa í tjaldi; á sama tíma vill hann láta moka 5500 milljónum í hælis­leit­endur bara á þessu ári - og meira síðar!

Svo segja þessir bullukollar að það þurfi að loka göngu­deild fyrir krabba­meins­sjúka á Land­spítalanum í sumar af því að það vanti 3 milljónir!!!

Það er augljóst hvað þessir óþjóðhollu menn hafa í forgangi: sína "gráu theoríu" (Goethe): pólitíska kreddu innflutta frá evrópskum vinstrimönnum.

* http://www.dv.is/folk/2016/7/1/kolbeinn-proppe-mer-var-radlagt-ad-gefast-upp/

SOB, HH, JVJ


Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband